ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ថ្លែងថា រាជរដ្ឋាភិបាលនៅតែបន្តខិតខំអភិវឌ្ឍន៍នូវហេដ្ឋារចនាសម្ព័ន្ធផ្សេងៗ ព្រោះជាវិស័យអាទិភាព និងជាតម្រូវការចាំបាច់របស់ពលរដ្ឋ ។

ក្នុងពិធីកាត់ខ្សែរបូរសម្ពោធដាក់ឱ្យប្រើប្រាស់ជាផ្លូវការស្ពានបេតុង ១ខ្សែរ និងផ្លូវបេតុង១ខ្សែរតភ្ជាប់សងខាងស្ពាន ស្ថិតនៅភូមិក្រាំងស្វាយ សង្កាត់ក្រាំងពង្រ ខណ្ឌដង្កោ នៅថ្ងៃទី៤ ខែមិថុនា ឆ្នាំ២០២៣ សម្ដេចកិត្តិសង្គហបណ្ឌិត មានប្រសាសន៍ថា បច្ចុប្បន្ននេះ រាជរដ្ឋាភិបាលចាត់ទុកវិស័យហេដ្ឋារចនាសម្ព័ន្ធរូបវ័ន្ត ជាវិស័យអាទិភាពមួយ ក្នុងបណ្តាវិស័យអាទិភាពដ៏ទៃទៀត ដែលបានដើរតួនាទីយ៉ាងសំខាន់ក្នុងការកាត់បន្ថយភាពក្រីក្ររបស់ពលរដ្ឋ ហើយបានដាក់បញ្ចូល ទៅក្នុងកម្មវិធីនយោបាយយុទ្ធសាស្ត្រចតុកោណគ្រប់ដំណាក់កាល ជាពិសេសផែន ការ យុទ្ធសាស្ត្រអភិវឌ្ឍន៍ជាតិ ។

សម្ដេចបន្តថា ទន្ទឹមនឹងនោះផងដែររាជរដ្ឋាភិបាល ក៏បានខិតខំស្តារ និងអភិវឌ្ឍហេដ្ឋារចនាសម្ព័ន្ធដឹកជញ្ជូន យ៉ាងច្រើនខ្វាត់ខ្វែង ដូចសរសៃឈាម នៅពាសពេញផ្ទៃប្រទេស សំដៅជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្រឱ្យកាន់តែថយចុះបន្ថែមទៀត និងលើកកម្ពស់កម្រិតជីវភាពរបស់ប្រជាពលរដ្ឋ ឱ្យបានកាន់តែប្រសើរឡើងជាលំដាប់ ។

គួរបញ្ជាក់ថា សមិទ្ធិផលដែលបានសម្ពោធដាក់ឲ្យប្រើប្រាស់នេះ ជាអំណោយរបស់សម្តេច ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានក្រុម ការងាររាជរដ្ឋាភិបាលចុះមូលដ្ឋាន នៅរាជធានីភ្នំពេញ ដោយស្ពានបេតុង ១ខ្សែរនោះ មានទទឹង៨ម៉ែត្រ បណ្តោយ៩៨ម៉ែត្រ និងផ្លូវបេតុង១ខ្សែរ (ឆ្លងកាត់ដៃស្ទឹងព្រែកត្នោត) បានចាប់ផ្តើមបើកការដ្ឋានសាងសង់ កាលពីថ្ងៃទី២៩ ខែតុលា ឆ្នាំ២០២២ និងបញ្ចប់ការសាងសង់ នៅថ្ងៃទី៣០ ខែឧសភា ឆ្នាំ២០២៣ និងបាន ចំណាយថវិការសាងសង់អស់ ១លាន ៩ម៉ឺនដុល្លារ ក្រោមការគាំទ្រជាថវិការបស់ ឧកញ៉ា អៀង ពិសិដ្ឋ អគ្គនាយកក្រុមហ៊ុនរិទ្ធីសិដ្ឋ ដេវែឡូបមឹន រួមជាមួយនឹងសហការី ៕ ដោយ ៖ បាន សុខរិទ្ធិ