ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា សម្តេចកំពុងមានការ​ស្រមើស្រមៃ​ថា នឹងមានថ្ងៃណាមួយអាស៊ាននឹងធ្វើការដេញថ្លៃធ្វើជាម្ចាស់​ផ្ទះកីឡាបាល់ទាត់​ពិភពលោក( World Cup)ជាក់ជាមិនខាន ហើយសម្តេចក៏ចង់ឲ្យមានក្រុមបាល់ទាត់​មួយក្រុម​ដោយកីឡាករខ្លាំងៗ​ពីប្រទេសនីមួយៗនៅក្នុង តំបន់អាស៊ានដាក់បញ្ចូលគ្នា​ ដើម្បីចូលរួមប្រកួត​លំដាប់​ពិភពលោកផងដែរ។

សម្តេចតេជោ ហ៊ុន សែន បានថ្លែងថា សម្តេចមិនរំពឹងថាកីឡាករនៅបណ្តាប្រទេសនីមួយៗ នៅ ក្នុងតំបន់អាស៊ាននេះអាចយកឈ្នះកីឡាករគេនោះទេ ដូច្នេះគប្បីឲ្យមានការរួមបញ្ចូល​គ្នា​ជាក្រុមមួយពិត ល្អ ខណៈសព្វថ្ងៃនេះអាស៊ានមានប្រទេសចំនួន១១​ហើយបូករួមទាំង​ប្រទេសទីម័រខាងកើតនោះ។

ការថ្លែងរបស់សម្តេចបែបនេះ គឺបានធ្វើឡើង ក្នុងឱកាសអញ្ជើញជាអធិបតីភាពក្នុងពិធីប្រគល់​សញ្ញាបត្រ​ជូននិស្សិតបញ្ចប់ការសិក្សា ​ពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្ត​សេដ្ឋកិច្ចសរុបជិត៦ពាន់នាក់​ នាព្រឹកថ្ងៃទី៥ ខែមិថុនា​ ឆ្នាំ២០២៣នេះ នៅមជ្ឈមណ្ឌលមហាសន្និបាទកោះពេជ្យ៕អត្ថបទ៖ បាន ចក់