អ៊ីស្រាអែល៖ ក្រុមនគរបាលអ៊ីស្រាអែល បានប៉ះទង្គិចគ្នាជាមួយក្រុមបាតុករប៉ាឡេស្ទីន នៅតំបន់ពិសិដ្ឋស្ថិតក្នុងទីក្រុងហ្ស៊េរុយសាឡឹម ដែលជាការប្រឈមដាក់គ្នាចុងក្រោយ ធ្វើឲ្យទីក្រុងមួយនេះ ជិតធ្លាក់ក្នុងការផ្ទុះជម្លោះ។
អំពើហិង្សានៅជុំវិញបរិវេនព្រះវិហារ អាល់-អាក់សា បានកើតមានឡើង ក្រោយភាពតានតឹងរយៈពេលជាច្រើនថ្ងៃរវាងជនប៉ាឡេស្ទីន និងក្រុមអាជ្ញាធរអ៊ីស្រាអែល នៅតំបន់ទីក្រុងចាស់ ស្ថិតក្នុងទីក្រុងហ្សេរុយសាឡឹម។
ជនប៉ាឡេស្ទីន រាប់រយនាក់ និងមន្ត្រីនគរបាលអ៊ីស្រាអែលរាប់សិបនាក់ បានរងរបួសក្នុងរយៈពេលប៉ុន្មានថ្ងៃកន្លងមកនេះ។ រូបភាពពីទូរទស្សន៍ Sky News របស់ចក្រភពអង់គ្លេស ឃើញក្រុមនគរបាលប្រដាប់ដោយអាវុធ បានចាប់ខ្លួនជនប៉ាឡេស្ទីន និងចងស្លាបសេកផ្ដួលទៅលើដី មុនពេលដឹកពួកគេចេញ។
កាលពីព្រឹកថ្ងៃចន្ទ ក្រុមមន្ត្រីនគរបាល បាញ់ឧស្ម័នបង្ហូរទឹកភ្នែក និងគ្រាប់បែកភ្លើង ហើយក្រុមបាតុករ បានចោលដុំថ្ម និងវត្ថុរឹងផ្សេងទៀត មកលើក្រុមនគរបាល។
ក្រុមនគរបាល បាននិយាយថា ក្រុមបាតុករ បានចោលដុំថ្មចេញពីបរិវេណព្រះវិហារ ចូលទៅផ្លូវជាប់គ្នា ហើយជនប៉ាឡេស្ទីន បានអះអាងដែរថា ក្រុមនគរបាល បានចោលគ្រាប់បែកភ្លើង មកលើបរិវេនព្រះវិហារ អាល់-អាក់សា៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
