ការប៉ះទង្គិចគ្នា រវាងភាគីសង្គ្រាមនៅស៊ូដង់ បានកើនឡើងនៅក្នុងរដ្ឋធានី Khartoum កាលពីថ្ងៃអាទិត្យ បន្ទាប់ពីការផុតកំណត់នៃកិច្ចព្រមព្រៀងបទឈប់បាញ់ដ៏ផុយស្រួយ ដែលបានធ្វើឲ្យជម្លោះមានរយៈពេលច្រើនសប្តាហ៍មកហើយនោះ អូសបន្លាយពេលវេលាបន្តទៀត។ ការប្រយុទ្ធគ្នារវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័សជាគូប្រជែង បានបន្តទោះបីជាមានបទឈប់បាញ់ច្រើនលើកដដែលៗ។

កិច្ចព្រមព្រៀងលើកចុងក្រោយ ដែលបានផុតកំណត់កាលពីល្ងាចថ្ងៃសៅរ៍ ត្រូវបានចុះហត្ថលេខាក្នុងទីក្រុង Jeddah ប្រទេសអារ៉ាប៊ីសាអ៊ូឌីត កាលពីថ្ងៃទី២០ ខែឧសភា រវាងអ្នកតំណាងនៃភាគីទាំងពីរ មានរយៈពេល៧ថ្ងៃ សម្រាប់ការផ្តល់ជំនួយមនុស្សធម៌។

លោក Momen Almakki អ្នកសារព័ត៌មាន មានមូលដ្ឋាននៅប្រទេសស៊ូដង់ បាននិយាយកាលពីថ្ងៃអាទិត្យថា ទីក្រុងKhartoum នៅតែមើលឃើញការប៉ះទង្គិចគ្នាដោយហិង្សា រវាងក្រុមយោធាជាគូប្រជែងទាំងពីរ ដោយភាគីទាំងពីរប្រើប្រាស់អាវុធធុនធ្ងន់។ លោក Momen Almakki និយាយថា ស្ថានភាពនៅទីនេះ ក្នុងរដ្ឋធានី Khartoum នៅតែធ្ងន់ធ្ងរ។ គ្មានថ្ងៃណាមួយដែលកន្លងផុតទៅគ្មានការប៉ះទង្គិចគ្នានោះទេរវាងកងកម្លាំងគាំទ្ររហ័ស និងកងកម្លាំងប្រដាប់អាវុធស៊ូដង់។ នៅពេលនេះកងទ័ពជាតិកំពុងប្រើប្រាស់យន្តហោះចម្បាំងនិងកាំភ្លើងធំធុនធ្ងន់ដើម្បីវាយប្រហារ និងដាក់គោលដៅលើទីបញ្ជាការកងកម្លាំងគាំទ្ររហ័ស ដែលបានរាលដាលក្នុងរដ្ឋធានី Khartoum។ រីឯកងកម្លាំងគាំទ្ររហ័សក៏កំពុងប្រើប្រាស់អាវុធធុនធ្ងន់ និងគ្រាប់ផ្លោងប្រឆំាងយន្តហោះ។

ការប៉ះទង្គិចគ្នា បានកើនឡើងខ្លាំងនៅក្នុងទីក្រុង Darfur ភាគខាងលិច ជាកន្លែងដែលមានជនស៊ីវិល​យ៉ាង​ហោចណាស់៤០នាក់បានស្លាប់។

អភិបាលក្រុងលោក Mini Arko Minawi កាលពីថ្ងៃអាទិត្យបានប្រកាសថាទីក្រុង Darfur ជាតំបន់​មហន្តរាយ ដែលគ្របដណ្តប់លើរដ្ឋទាំង៥របស់ខ្លួន ហើយបានអំពាវនាវដល់សហគមន៍អន្តរជាតិ​ផ្តល់ដល់តំបន់នេះនូវជំនួយមនុស្សធម៌បន្ទាន់។