មន្ត្រីនិយាយថា សាកសពជនរងគ្រោះក្នុងឧបទ្ទវហេតុរថភ្លើងដែលមិនទាន់ត្រូវបានបញ្ជាក់ប្រមាណ ១០០នាក់ ត្រូវបានបញ្ជូនទៅកាន់មន្ទីរពេទ្យមហាវិទ្យាល័យវេជ្ជសាស្ត្រ ក្នុងរដ្ឋ Odisha ភាគខាងកើតប្រទេសឥណ្ឌា កាលពីថ្ងៃអាទិត្យ ប៉ុន្មានថ្ងៃបន្ទាប់​ពីរថភ្លើងបុកគ្នាបណ្តាលឲ្យមានមនុស្សស្លាប់ច្រើនបំផុត នៅក្នុងប្រទេសឥណ្ឌា ក្នុងរយៈពេលជាង២​ទសវត្សរ៍មកនេះ ដែលបានសម្លាប់មនុស្សយ៉ាងហោចណាស់២៨៨នាក់។

ដោយសារតែខ្វះសាលតម្កល់សាកសព រដ្ឋាភិបាលទីក្រុង Odisha បាននិយាយថា សាកសព១០០នាក់ ក្នុងចំណោមសាកសព១៦០នាក់ ដែលពុំទាន់ត្រូវបានបញ្ជាក់ ត្រូវបានបញ្ជូនទៅកាន់វិទ្យាស្ថានវិទ្យាសាស្ត្រសុខាភិបាលឥណ្ឌា ក្នុងទីក្រុង Bhubaneswar មានចម្ងាយប្រមាណ១៩៦គីឡូម៉ែត្រខាងត្បូងទីតាំងឧបទ្ទវហេតុ ក្នុងស្រុក Balasore ។

មន្ត្រីវិទ្យាស្ថាន បានប្រាប់ប្រព័ន្ធផ្សព្វផ្សាយក្នុងតំបន់ថា វិទ្យាស្ថាននេះ មានតួនាទីចម្បង​ជាមហាវិទ្យាល័យសុខាភិបាល ហើយក៏មានមហាវិទ្យាល័យពេទ្យរួមជាសាល​តម្កល់សាកសពផងដែរ ដែលអាចដាក់សកសពបាន ៤០នាក់។

អាជ្ញាធរនិយាយថា សាកសពដែលនៅសេសសល់ផ្សេងទៀត ត្រូវបានបញ្ជូនទៅកាន់មន្ទីរពេទ្យCapital មន្ទីរពេទ្យ Amri, មន្ទីរពេទ្យ Sum និងមន្ទីរពេទ្យឯកជនជាច្រើនផ្សេងទៀត។

មនុស្សជិត១.២០០នាក់ បានរងរបួសនៅពេលរថភ្លើងដឹកអ្នកដំណើរ បានបុកជាមួយរថភ្លើង​ដឹកទំនិញនៅមួកន្លែង ធ្លាក់ចេញពីផ្លូវ ហើយបានបុកជាមួយរថភ្លើង​ដឹកអ្នកដំណើរ​មួយគ្រឿងផ្សេងទៀត ក្នុងទិសដៅផ្ទុយគ្នានៅជិតស្រុក Balasore ​កាលពីថ្ងៃសុក្រទី២ ខែមិថុនា។