ក្រុមឃ្លាំមើលការតវ៉ាបាននិយាយថា កាលពីថ្ងៃអាទិត្យ (៤មិថុនា) នគរបាលរុស្ស៊ីបានចាប់ខ្លួន​មនុស្សជាង ១០០ នាក់ដែលបានដើរដង្ហែតាមផ្លូវ ដើម្បីប្រារព្ធខួបកំណើតអាយុ ៤៧ ឆ្នាំរបស់លោក Alexei Navalny ដែលជាមេដឹកនាំប្រឆាំងដ៏លេចធ្លោបំផុតរបស់ប្រទេសរុស្ស៊ី។

ប្រព័ន្ធផ្សព្វផ្សាយ OVD-Info បាននិយាយនៅក្នុងសេចក្តីថ្លែងការណ៍មួយថា មនុស្ស ១០៩ នាក់ត្រូវបានឃុំខ្លួននៅក្នុងទីក្រុងចំនួន ២៣ គិតត្រឹមម៉ោង ១០:៤២ នាទីយប់ ម៉ោងនៅទីក្រុងម៉ូស្គូ។ ក្រុមអាជ្ញាធរបានទប់ស្កាត់យ៉ាងពេញ​ទំហឹង​លើការមិនពេញចិត្តនានាចាប់តាំងពីការ​វាយលុក​របស់រុស្ស៊ី លើអ៊ុយក្រែន កាលខែកុម្ភៈឆ្នាំ ២០២២មក ហើយនៅក្នុងទីក្រុងភាគច្រើន​មានមនុស្សមួយក្ដាប់​តូចប៉ុណ្ណោះដែលត្រូវបានឃុំខ្លួន។

លោក Navalny កំពុងជាប់ទោសរួមគ្នារយៈពេលពី ១១ ទៅ ១២ ឆ្នាំពីបទក្លែងបន្លំ និងមើលងាយ​តុលាការលើការចោទប្រកាន់ដែលលោកនិយាយថា ការចោទប្រកាន់ទាំងនោះត្រូវបានប្រឌិត​ឡើង​ដើម្បីបំបិទមាត់លោក។

លោក Navalny ទទួលបានភាព​ល្បីល្បាញ​ដោយសារការ​ហ៊ាន​និយាយចំអកលើ​ការបង្ហាញពី​ឧត្តភាពរបស់លោកប្រធានាធិបតី វ្ល៉ាឌីមៀ ពូទីន និងចោទប្រកាន់លោកពីអំពើពុករលួយដ៏ធំនោះ បាននិយាយកាលពីខែមេសាថា ​រឿងក្ដីអំពើភេរវកម្ម "មិនសមទំនង" មួយត្រូវធ្វើឡើងប្រឆាំង​នឹងរូបលោក ដែលរឿងក្តីនេះ​អាចធ្វើឱ្យតុលាការកាត់​ទោសលោកឱ្យជាប់​ពន្ធនាគាររយៈពេល៣០ឆ្នាំ បន្ថែមទៀត៕