សីតុណ្ហភាព នៅក្នុងរដ្ឋធានីរបស់ប្រទេសចិន បានឡើងដល់ ៣៥អង្សាសេ នៅថ្ងៃចន្ទ (ទី៥ ខែមិថុនា)នេះ ខណៈប្រជាជន នៅទីក្រុងប៉េកាំងខ្លះ សម្ដែងនូវកង្វល់ពីសុខភាពរបស់ពួកគេ ក្នុងពេលកម្ដៅឡើងកាន់ខ្ពស់នេះ។

កម្មករសំណង់វ័យ ៥១ឆ្នាំម្នាក់ ដែលមាននាមត្រកូល Qiu (ឈីវ) បានប្រាប់សារព័ត៌មាន Reuters ថា៖ «និយាយដោយស្មោះត្រង់ ខ្ញុំព្រួយបារម្ភពីការដាច់សសៃរឈាមដោយសារកម្តៅខ្ពស់។ ខ្ញុំធ្លាប់មានជំងឺនេះពីមុនមក។ ឥឡូវនេះ នៅពេលក្ដៅកាន់តែខ្លាំង ខ្ញុំមានអារម្មណ៍មិនស្រួលក្នុងខ្លួនសោះ»។

ប្រព័ន្ធផ្សព្វផ្សាយរដ្ឋ បានរាយការណ៍ នៅថ្ងៃចន្ទនេះថា ផ្នែកខ្លះនៃភាគខាងជើងប្រទេសចិន ក៏ត្រូវបានគេរំពឹងថា នឹងមានសីតុណ្ហភាពលើសពី ៣០អង្សាសេដែរ។

បណ្តាប្រទេសនៅទូទាំងអាស៊ី បានទទួលការរងនូវរលកកម្ដៅក្ដៅខ្លាំងមួយលើកទៀត ដែលបានសីតុណ្ហភាពហក់ឡើងខ្ពស់បំផុតតាមរដូវកាលនៅទូទាំងតំបន់កាលពីមុន ដោយបង្កើនក្ដីបារម្ភយ៉ាងខ្លាំងពីសមត្ថភាពរាងកាយដែលត្រូវសម្របខ្លួនភ្លាមៗទៅនឹងបម្រែបម្រួលអាកាសធាតុដ៏ឆាប់រហ័សបែបនេះ។

បន្ទាប់ពីត្រូវញាំញីដោយរលកកម្ដៅ ដែលបានវាយប្រហារផ្នែកដ៏ធំរបស់ទ្វីបនេះ កាលពីខែមេសា សីតុណ្ហភាពបានចាប់ផ្ដើមឡើងក្ដៅម្តងទៀត នៅចុងខែឧសភា ដែលតាមធម្មតា គឺជាការចាប់ផ្តើមនៃរដូវខ្យល់មូសុងដ៏ត្រជាក់៕