កងទ័ពជើងទឹកសហរដ្ឋអាមេរិក បានបញ្ចេញវីដេអូនៃអ្វីដែលខ្លួនហៅថា «អន្តរកម្មមិនមានសុវត្ថិភាព» ជាមួយនាវាចម្បាំងចិន ដែលនាវាចិនបានបើកកាត់ពីមុខនាវាអាមេរិក ក្នុងចម្ងាយ ១៥០យ៉ាដ (ប្រមាណជា ១៣៧ម៉ែត្រ)។

យោធាសហរដ្ឋអាមេរិកបាននិយាយថា នាវាពិឃាតរបស់ខ្លួន USS Chung-Hoon ក៏ដូចជានាវាចម្បាំងកាណាដា កំពុងធ្វើការឆ្លងកាត់តាមទម្លាប់ នៅច្រកសមុទ្រតៃវ៉ាន់ដ៏រសើប នាពេលនោះ ហើយនៅក្នុងវីដេអូ អាចមើលឃើញថា នាវាចិនកំពុងបើកឆ្លងកាត់ផ្លូវរបស់នាវាពិឃាដ ដែលត្រូវបានគេរាយការណ៍ថា ត្រូវបន្ថយល្បឿន ដើម្បីបញ្ចៀសការប៉ះទង្គិច។

មេបញ្ជាការកងទ័ពជើងទឹកកាណាដា លោក Paul Mountford បានឃើញហេតុការណ៍នេះដោយផ្ទាល់ភ្នែក ដោយលោកបាននិយាយថា៖ «ការដែលគេប្រកាសតាមវិទ្យុ មុនពេលមានសកម្មភាពនេះ វាបញ្ជាក់យ៉ាងច្បាស់ថា ជាចេតនា។ ការបើកពត់ពេនចូលមកកៀកគ្នាចម្ងាយ ១៥០យ៉ាដ (ប្រមាណជា ១៣៧ម៉ែត្រ) គឺគួរឲ្យខ្លាចណាស់ ហើយយើងមិនចង់នៅជិតនាវាផ្សេងទៀតទេ ព្រោះមានអ្វីៗច្រើនណាស់ ដែលអាចគណនា ហើយយើងពិតជាអាចមានការប៉ះទង្គិចគ្នា»។

យោធារបស់ប្រទេសចិន បានស្តីបន្ទោសសហរដ្ឋអាមេរិក និងប្រទេសកាណាដា ចំពោះសមយុទ្ធរួមគ្នានេះ ហើយនៅថ្ងៃចន្ទនេះ ទីក្រុងប៉េកាំង បាននិយាយថា នាវារបស់ខ្លួន បានធ្វើប្រតិបត្តិការ ដោយស្របច្បាប់ និងលក្ខខណ្ឌសុវត្ថិភាព។

កាលពីថ្ងៃអាទិត្យ ក្រសួងការពារជាតិតៃវ៉ាន់ បានអំពាវនាវឲ្យចិនគោរពសិទ្ធិនៃសេរីភាព ក្នុងការធ្វើនាវាចរណ៍។ ហេតុការណ៍នេះកើតឡើង ក្នុងខណៈដែលក្រុងប៉េកាំង និងក្រុងវ៉ាស៊ីនតោន បានបន្ទោសគ្នាទៅវិញទៅមកដែលមិនព្រមរៀបចំឲ្យមានការពិភាក្សាផ្នែកយោធា។ ភាពតានតឹង រវាងប្រទេសទាំងពីរ ជុំវិញបញ្ហាពាណិជ្ជកម្ម បញ្ហាតៃវ៉ាន់ និងបញ្ហានៃការវាយលុករបស់រុស្ស៊ី បានកើនឡើងកាន់តែខ្លាំង ក្នុងប៉ុន្មានសប្តាហ៍ថ្មីៗនេះ៕