ភ្នំពេញ៖កម្ពុជាកំពុងចាប់ផ្តើមសាងសង់គម្រោងអគ្គិសនីធំៗចំនួន ៥ កន្លែង ដែលមានអនុភាពថាមពលសរុប ១ ៩៧៥ មេហ្កាវ៉ាត់ ក្នុង​នោះក្រោយពីសាងសង់រួច គម្រោងទាំងនេះ នឹងដាក់ចូលក្នុងបណ្តាញជាតិឲ្យប្រើប្រាស់ជាផ្លូវការជាបន្តបន្ទាប់ ដើម្បីឆ្លើយ​តប​តាម​តម្រូវ​ការនៃការរីកចម្រើននៅកម្ពុជា ។

ឯកឧត្តម វិចទ័រ ហ្សូនា អគ្គនាយកនៃអគ្គនាយកដ្ឋានថាមពល ក្រសួងរ៉ែ និងថាមពល បានថ្លែង​ប្រាប់​ភ្នាក់​ងារ​អ្នក​យក​ព័ត៌​មាន BTV ស្តីពីគម្រោងអភិវឌ្ឍន៍វិស័យអគ្គិសនីថ្មីៗនៅកម្ពុជា នៅថ្ងៃទី ១០ ខែ ឧសភា ឆ្នាំ ២០២១ នេះថា ពាក់​ព័ន្ធ​ការ​អភិវឌ្ឍ​វិស័យ​អគ្គិសនី នៅក្នុងអណត្តិនេះ, កម្ពុជានឹងមានការអភិវឌ្ឍន៍វិស័យអគ្គិសនីធំៗចំនួន៥ កន្លែង ចំណែកការអភិឌ្ឍន៍វារីអគ្គិសនី យើង​មានក្រុមហ៊ុនចំនួនពីរ ក្នុងនោះក្រុមហ៊ុន Cambodian Tatay Hydropower ដែលកំពុងសាងសង់គម្រោងតាតៃលើ មាន​អនុ​ភាព ១៥០ មេហ្គាវ៉ាត់ ក្រោយសាងសង់រួច និងដាក់បញ្ចូលបណ្តាញជាតិនៅឆ្នាំ២០២៣ ។ ចំណែកគម្រោង​វារី​អគ្គិ​សនី​ស្ទឹង​ពោធិ៍សាត់​១ កំពុងចាប់ផ្តើមសាងសង់ដោយក្រុមហ៊ុន SPHS Cambodia Co. Ltd., ដោយមានអនុភាព ៨០ មេហ្គាវ៉ាត ក្រោយ​សាង​សង់​រួច គឺគ្រោងដាក់បញ្ចូលក្នុងបណ្តាញជាតិ នៅឆ្នាំ ២០២៦ ផងដែរ។

ចំពោះរោងចក្រក្រៅពីវារីអគ្គិសនី កម្ពុជាមានរោងចក្រអគ្គិសនីដុតធ្យូងថ្មចំនួន ៣ ផ្សេងៗទៀត ក្នុងនោះក្រុមហ៊ុន China Huadain មានអនុភាព ៧០០ មេហ្គាវ៉ាត កំពុងសាងសង់ ហើយក្រោយពីសាងសង់រួច គ្រោងភ្ជាប់ចូលបណ្តាញជាតិ នៅឆ្នាំ ២០២២ មួយលើក និងឆ្នាំ ២០២៣ បន្ថែមទៀត ។ ចំណែកគម្រោងក្រុមហ៊ុនរ៉ូយ៉ាល់គ្រុប មានអនុភាព ៧០០ មេហ្គាវ៉ាត នៅ​បុទុម​សាគរ គ្រោងភ្ជាប់ចូលបណ្តាញជាតិ នៅឆ្នាំ ២០២៤ ចំនួន ៣៥០ មេហ្គាវ៉ាត និងនៅឆ្នាំ ២០២៥ ចំនួន ៣៥០ មេហ្គាវ៉ាត ។ ដោយឡែកក្រុមហ៊ុនរបស់ឧកញ៉ា វិញហួរ មានអនុភាព ៧០០ មេហ្គាវ៉ាត ដោយគ្រោងភ្ជាប់ចូលបណ្តាញជាតិចំនួន ២ លើក​ផង​ដែរ គឺនៅឆ្នាំ ២០២២ និង ២០២៣ ខាងមុខនេះ ។

ឯកឧត្តម បន្តឲ្យដឹងថា ក្រៅពីការអភិវឌ្ឍន៍វិស័យថាមពលធំៗទាំងនេះ, នៅក្នុងដំណាក់កាលនេះដែរ កម្ពុជានៅ​មាន​គម្រោង សាងសង់ថាមពលពីសូឡាចំនួន ២ ផ្សេងទៀត ក្នុងនោះក្រុមហ៊ុន Prime Road មានអនុភាព ៦០ មេហ្គាវ៉ាត និង​គម្រោង​សាងសង់របស់ក្រុមហ៊ុន Green Sustainable Ventrue ចំនួន ២០ មេហ្គាវ៉ាត ដោយគ្រោងភ្ជាប់ចូល​បណ្តាញ​ជាតិ​នៅ​ចុង​ឆ្នាំ ២០២១ នេះ។ ជុំវិញនិងការអភិវឌ្ឍន៍អគ្គិសនីខាងលើ ក្រសួងរ៉ែ និងថាមពល គឺមានផែនការដាក់ចូល​បណ្តាញ​ជាតិ​ជាបន្ត​បន្ទាប់ ដើម្បីជម្រុញឲ្យស្របទៅតាមផែនការអភិវឌ្ឍន៍ថាមពល និងការរីកច្រើននៅកម្ពុជា ។

​

សូមបញ្ជាក់ថា៖ ក្នុងពេលកន្លងមកនេះ ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល បានថ្លែងឲ្យដឹងថា ការ​ផ្គត់​ផ្គង់​អគ្គិសនី ក្នុងនៅកម្ពុជា មានទំហំសរុបជាង ៣ ពាន់មេហ្គាវ៉ាត់ ក្នុងនោះការជួបបញ្ហាវិបត្តិជម្ងឺកូវីដ-១៩ នេះ ការ​ប្រើប្រា​ស់​អគ្គិ​សនី​បានធ្លាក់ចុះយ៉ាងខ្លាំង, ជាពិសេសនៅពេលយប់ ចំនួននៃការប្រើប្រាស់អគ្គិសនីបានបន្តធ្លាក់ចុះកាន់តែទាប ដែលបញ្ហាទាំង​នេះ ជាកក្តាធ្វើឲ្យចំណូលពីការលក់អគ្គសនីបានធ្លាក់ចុះ ៕

អត្ថបទ៖ សុន រ៉ាឌី