បាល់ទាត់៖ អ្នកចាំទីដៃទី១ ក្រុមការពារតំណែងជើងឯកបឹងកេត ហ៊ុល គឹមហ៊ុយ បានបញ្ជាក់ថា ខ្លួនក៏ដូចជាមិត្តរួមក្រុមបានប្ដេជ្ញាចិត្ត និងខិតខំប្រឹងប្រែងយ៉ាងខ្លាំងដើម្បីជួយក្លិបស្ដារមុខមាត់ឡើងវិញ បន្ទាប់ពីរងបរាជ័យ ២ប្រកួតផ្ទួនកាលពីដើមរដូវកាលកន្លងទៅ។
គឹមហ៊ុយ បានបញ្ជាក់ថា របួសរបស់ខ្លួនបានជាសះស្បើយ ១០០% ហើយ ពោលគឺតាំងពី ១សប្ដាហ៍ក្រោយប្រកួតជាមួយភ្នំពេញក្រោនម្ល៉េះ។ ចំពោះការត្រឡប់មកវិញនៃលីគកំពូលកម្ពុជានាចុងសប្ដាហ៍នេះវិញ គេបានត្រៀមខ្លួនជាស្រេចអមជាមួយការប្ដេជ្ញាចិត្តខ្ពស់ ដើម្បីជួយក្រុមស្វែងរកលទ្ធផលល្អត្រឡប់មកវិញ។ ការលើកឡើងរបស់ម្ចាស់ស្រោមដៃមាសលីគ ឆ្នាំ២០២០ នេះ ស្របពេលក្រុមបឹងកេតត្រូវធ្វើដំណើរទៅជួបក្រុមម្ចាស់ផ្ទះអាស៊ីអឺរ៉ុប ក្នុងជំនួបបង្គ្រប់សប្ដាហ៍ទី២ នាថ្ងៃទី១៦ ខែឧសភាចុងសប្ដាហ៍នេះនៅកីឡដ្ឋាន AEU Sport Park។ ចំពោះលទ្ធផល ២ប្រកួតបើករដូវកាលកន្លង បឹងកេតបានប្រកួតចាញ់ក្រុមណាហ្គាវើលដ៏ ១-០ និងចាញ់ក្រុមភ្នំពេញក្រោន ២-១ ក្នុងទឹកដីដូចគ្នា។
ប៉ុន្ដែក្នុងចំណោម ២ប្រកួតដំបូងនេះ អ្នកចាំទីដៃទី១ ហ៊ុល គឹមហ៊ុយ បង្ហាញខ្លួនបានប្រមាណ ១៣៧នាទីប៉ុណ្ណោះ បន្ទាប់ពីប្រកួតទី២ ជាមួយភ្នំពេញក្រោន អតីតយុវជនសាលាបាល់ទាត់ជាតិបាទីរូបនេះបានរងរបួស ហើយត្រូវបង្ខំចិត្តប្ដូរចេញភ្លាមៗនៅនាទី៤៧ មុនក្រុមភ្នំពេញក្រោនរកបាន ២គ្រាប់ ធ្វើឲ្យក្រុមបឹងកេត មិនទាន់ស្គាល់ឈ្នះ និងមានពិន្ទុរាប់ឡើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
