ក្រុមសាច់ញាតិជនរងគ្រោះដោយសារឧបទ្ទវហេតុរថភ្លើងបុកគ្នានៅប្រទេសឥណ្ឌាបានប្រមូលផ្តុំគ្នានៅតុជំនួយនៃមន្ទីរពេទ្យនៅទូទាំងទីក្រុង Bhubaneswar ភាគខាងកើតប្រទេសឥណ្ឌាកាលពីថ្ងៃចន្ទ (០៥ មិថុនា) ដើម្បីកំណត់អត្តសញ្ញាណសាកសពពីគ្រោះថ្នាក់រថភ្លើងដ៏សាហាវបំផុត របស់ប្រទេសក្នុងរយៈពេលពីរទសវត្សរ៍ចុងក្រោយនេះ។

សោកនាដកម្មរថភ្លើងនោះបានកើតឡើងកាលពីថ្ងៃសុក្រ (០២ មិថុនា) នៅពេលដែលរថភ្លើង ដឹក​អ្នកដំណើរបានបុករថភ្លើងដឹកទំនិញដែលកំពុងចតចោល ហើយបានខ្ទាតចេញពីផ្លូវទៅបុករថភ្លើង​ដឹកអ្នកដំណើរមួយទៀតដែលកំពុងធ្វើដំណើរ​បញ្ច្រាសទិស​គ្នា ​ដោយបានសម្លាប់មនុស្ស​យ៉ាងហោច​ណាស់ ២៨៨ នាក់ និងរបួស ១.២០០ នាក់។

អ្នកគ្រប់គ្រងផ្នែកផ្លូវដែកនៃស្ថានីយរថភ្លើងកណ្ដាលភាគខាងកើតលោក Rinkesh Roy បាននិយាយថា " តាមព័ត៌មានរបស់យើង បច្ចុប្បន្ននេះមានសាកសពមនុស្សចំនួន ១០១នាក់ មិនទាន់ត្រូវបានកំណត់អត្តសញ្ញាណនៅឡើយទេ" ។

ក្រុមសាច់ញាតិជនរងគ្រោះបានព្យាយាមកំណត់អត្តសញ្ញាណសពសាច់ញាតិតាមរយៈរូបថត។

ទោះបីជាយ៉ាងណាក៏ដោយ មនុស្សមួយចំនួនមិនអាចដឹងពីទីតាំងសាកសពសាច់ញាតិ​របស់ពួកគេ​នៅក្នុងមន្ទីរពេទ្យនោះទេ ​ហើយបាននិយាយថា កន្លែងតម្កល់សាកសពទាំងអស់គ្រាន់​តែបង្ហាញព័ត៌មានអំពីអ្នកដំណើរដែលធ្វើដំណើរក្នុង "បន្ទប់ម៉ាស៊ីនត្រជាក់នៅលើរថភ្លើង" តែប៉ុណ្ណោះ។

ការស៊ើបអង្កេតជាផ្លូវការលើឧបទ្ទវហេតុដ៏ធ្ងន់ធ្ងរនេះបានចាប់ផ្តើមកាលពីថ្ងៃចន្ទបន្ទាប់ពីការរកឃើញបឋមបានចង្អុលបង្ហាញថា ​បញ្ហាបច្ចេកទេសជាមូលហេតុនៃគ្រោះថ្នាក់នេះ៕