អ្នកគ្រប់គ្រងតំបន់ Kherson របស់ប្រទេសអ៊ុយក្រែន បាននិយាយថា ទឹកនឹងឡើងដល់កម្រិតធ្ងន់ធ្ងរ ក្នុងរយៈពេល ៥ម៉ោង បន្ទាប់ពីទំនប់ដ៏ធំមួយ ត្រូវបានបំផ្លាញ ដែលទំនប់នោះ នៅជិតរោងចក្រថាមពលនុយក្លេអ៊ែរ Zaporizhzhia ហើយអាជ្ញាធរអ៊ុយក្រែនបានស្នើឲ្យអ្នកស្រុកនៅតំបន់ ដែលងាយរងគ្រោះដោយទឹកជំនន់ឲ្យជម្លៀសចេញ ខណៈដែលទឹកបានហូរចេញពីទំនប់ Nova Khakova នៅក្នុងតំបន់ Kherson ភាគខាងត្បូង។

ក្រសួងមហាផ្ទៃរបស់ប្រទេសអ៊ុយក្រែន បានឲ្យដឹងក្នុងសេចក្តីថ្លែងការណ៍មួយនៅថ្ងៃអង្គារនេះថា៖ «ជាមួយនឹងការកើនឡើងនៃកម្រិតទឹក ក្រសួងបានជំរុញឲ្យមនុស្សគ្រប់រូបនៅក្នុង​ដ៏តំបន់​គ្រោះថ្នាក់នេះ បិទឧបករណ៍អគ្គិសនីទាំងអស់ យកឯកសារ និងសម្ភារៈសំខាន់ៗ និងថែទាំមនុស្សជាទីស្រលាញ់ និងសត្វចិញ្ចឹម»។

អាជ្ញាធររុស្ស៊ី និងអ៊ុយក្រែន បានទម្លាក់កំហុសដាក់គ្នាទៅវិញទៅមក ចំពោះការបំផ្លាញទំនប់នេះ ដោយទីក្រុងគីវ (Kyiv) បានហៅការវាយប្រហារនេះថា ជា«ការបំផ្លាញធម្មជាតិ» ខណៈដែលទីក្រុងម៉ូស្គូ បានស្តីបន្ទោសទៅលើ «ពួកភេរវករ» ដែលជាពាក្យប្រៀបធៀបរបស់រុស្ស៊ី សំដៅទៅលើកងកម្លាំងអ៊ុយក្រែន។

លោក Denys Sukhanov អ្នកស្ម័គ្រចិត្តមនុស្សធម៌ នៅក្នុងទឹកដី Kherson ដែលគ្រប់គ្រងដោយអ៊ុយក្រែន បាននិយាយប្រាប់សារព័ត៌មាន Suspilne ថា៖ «តំបន់ Kherson ត្រូវការជាបន្ទាន់នូវមនុស្ស ដែលនឹងមកបំពេញភារកិច្ចស្ម័គ្រចិត្ត ដើម្បីសម្របសម្រួលសកម្មភាព នៅចំណុចជម្លៀស ទទួលមនុស្ស ការដឹកមនុស្សតាមរថយន្តក្រុង ការតាំងទីកន្លែងស្នាក់នៅថ្មី និងការផ្ដល់ចំណីអាហារ»។

ចំណែកទីភ្នាក់ងារព័ត៌មានរដ្ឋរុស្ស៊ី Tass បានរាយការណ៍ថា មន្ត្រីលើកបន្តុបដោយរុស្ស៊ីម្នាក់ នៅទីក្រុង Nova Kakhovka បាននិយាយថា អ្នកស្រុកមកពីលំនៅឋានប្រហែល ៣០០ខ្នង ត្រូវបានជម្លៀសចេញ បន្ទាប់ពីទំនប់ នៅក្បែរនោះ បានបាក់។

ទំនប់ ដែលមានកម្ពស់ ៣០ម៉ែត្រ និងប្រវែង ៣,២គីឡូម៉ែត្រ និងដែលអាចផ្ទុកទឹកស្មើនឹងបឹងទឹកប្រៃ Great Salt Lake ក្នុងរដ្ឋ Utah សហរដ្ឋអាមេរិកនោះ ត្រូវបានសាងសង់ក្នុងឆ្នាំ១៩៥៦ នៅលើដងទន្លេ Dnipro ដែលជាផ្នែកមួយនៃរោងចក្រវារីអគ្គិសនី Kakhovka៕