ភ្នំពេញ​ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានស្នើដល់ក្រុមហ៊ុន របស់​ជប៉ុន​មួយ​ដែលមានឈ្មោះថា Procast Cambodia ជួយបណ្តុះបណ្តាលជំនាញផ្នែកថែរទាំមនុស្សចាស់បន្ថែមទៀតនៅកម្ពុជា ខណៈបច្ចុប្បន្នកម្ពុជាបានកំពុងមានសមាគមមនុស្សចាស់កាន់តែច្រើនទៅៗ។

នៅក្នុងកិច្ចជំនួបជាមួយលោក Kondo Yoshio ប្រធានក្រុមហ៊ុន Procast Cambodia និងសហការីនៅទីស្តីការក្រសួង នៅថ្ងៃទី៦ ខែមិថុនា ឆ្នាំ២០២៣នេះឯកឧត្តមរដ្ឋមន្រ្តីបានលើឡើងថា ការថែទាំងមនុស្សចាស់នេះ គឺជាកិច្ចការងារចាំបាច់​មួយសម្រាប់ពលរដ្ឋកម្ពុជា ដូច្នេះត្រូវតែមានជំនាញច្បាស់លាស់ ដើម្បីផ្តល់ភាពងាយស្រួល​ក្នុងកិច្ចការថែទាំ​ដោយ​មិន​អាចអត់បាននោះទេ។

ឯកឧត្តមរដ្ឋមន្រ្តី បានលើកឡើងទៀតថា ការរៀបចំឲ្យមានមណ្ឌលបណ្ដុះបណ្ដាល ការថែទាំមនុស្សចាស់ជាកា​រល្អ​ណាស់​សម្រាប់កម្ពុជា ហើយមណ្ឌលថែទាមនុស្សចាស់នេះ ជាកន្លែងអប់រំ សិក្សាដកបទពិសោធ៍ សម្រាប់សិក្ខាកាម ដែលមកសិក្សានៅទីនេះ រៀនយកជំនាញច្បាស់លាស់ក្នុងការថែទាំមនុស្សចាស់។

ថ្លែងនៅក្នុងកិច្ចជំនួបនោះដែរ លោក Kondo Yoshio បានលើកឡើងថា ខាងលោកមានគម្រោង នឹងបង្កើតមណ្ឌល​ថែទាំមនុស្សនៅកម្ពុជានាពេលខាងមុខនេះ ដូច្នេះក្នុងពេលដំណើរការលោកនឹងផ្តល់វគ្គ ជំនាញការថែទាំមនុស្ស​ចាស់នេះដល់ប្រជាជនកម្ពុជាផងដែរ។ ជាមួយគ្នានោះដែរ លោក Kondo Yoshio បានគោរពអញ្ជើញឯកឧត្តម វង សូត ទៅបំពេញទស្សនកិច្ចនៅប្រទេសជប៉ុនក្រោយកម្ពុជាធ្វើការបោះឆ្នោតសកលលើកទី៧នាខែកក្កដាខាងមុខនេះផងដែរ ដើម្បីទៅទស្សនានូវមណ្ឌលថែទាំងមនុស្សចាស់នៅប្រទេសជប៉ុន៕ អត្ថបទ ៖ បាន ចក់