រដ្ឋមន្ត្រីសម្របសម្រួលសម្រាប់កិច្ចការដែនសមុទ្រនិងវិនិយោគលោក Luhut Binsar Pandjaitan បាននិយាយនៅថ្ងៃអង្គារនេះថា ប្រទេសឥណ្ឌូនេស៊ីបានត្រៀមទប់យ៉ាងល្អសម្រាប់ការដែលអាចកើតមានផ្សែងអ័ព្ទឆ្លងព្រំដែននៅឆ្នាំនេះ។ លោក Luhut បានប្រាប់អ្នករាយការណ៍ព័ត៌មាននៅក្រៅវិទិកាសន្និសីទសប្តាហ៍នៃភាពប្រសើរផ្នែកអេកូឡូស៊ី ២០២៣ ដែលបានធ្វើឡើងនៅតំបន់រមណីយដ្ឋាន Marina Bay Sands ប្រទេសសិង្ហបុរីថា យើងមានបច្ចេកវិទ្យាសម្របសម្រួលអាកាសធាតុ។ នេះហើយជាអ្វីដែលយើងអាចបង្កើតទឹកភ្លៀងមុនពេលកំណត់ដើម្បីត្រៀមបង្ការទឹកប្រើប្រាស់ ដូច្នេះយើងមានទឹកគ្រប់គ្រាន់ដើម្បីបញ្ឈប់អគ្គិភ័យ។
នៅពេលត្រូវបានសួរអំពីបញ្ហាផ្សែងអ័ព្ទ លោកនិយាយថា ផ្សែងអ័ព្ទពុំមែនជាបញ្ហាពិតប្រាកដនោះទេ ខ្ញុំជឿជាក់។ ផ្សែងអ័ព្ទនៅតំបន់អាស៊ីអាគ្នេយ៍ដោយសារតែភ្លើងឆេះព្រៃនៅក្នុងប្រទេសឥណ្ឌូនេស៊ីជាបញ្ហាកើតឡើងជាយូរមកហើយក្នុងរយៈពេលជាច្រើនទសវត្សរ៍កន្លងទៅនេះ។
ក្នុងឆ្នាំ២០១៣ ការឆេះទ្រង់ទ្រាយធំ នៅក្នុងផ្នែកជាច្រើននៅកោះសូម៉ាត្រា និងប៊័រណេអូ ដែលនាំទៅរកវិបត្តិផ្សែងអ័ព្ទ ដែលបានធ្វើឲ្យប៉ះពាល់ដល់ប្រទេសជាច្រើនរួមមានទាំងប្រទេសសិង្ហបុរី ម៉ាឡេស៊ី ព្រុយណេ និងប្រទេសថៃ។
សន្ទស្សន៍ស្តង់ដារបំពុលបរិស្ថានរយៈពេល៣ម៉ោង ក្នុងប្រទេសសិង្ហបុរី បានឈានដល់កំណត់ត្រា ៤០១ ក្នុងខែមិថុនានៅឆ្នាំ២០១៣ ដែលនាំឲ្យមានការប្រញាប់ប្រញាល់ស្តុកទុកម៉ាស់N95 ។ ស្ថានភាពផ្សែងអ័ព្ទនៅក្នុងប្រទេសម៉ាឡេស៊ី បានឈានដល់កម្រិតអាក្រក់បំផុតចាប់តាំងពីឆ្នាំ២០០៥។ នៅក្នុងខែកញ្ញា ឆ្នាំ២០១៥ ដែលជាឆ្នាំនៃបាតុភូត El Nino សន្ទស្សន៍ស្តង់ដាបំពុលបរិស្ថានរយៈពេល២៤ម៉ោង បានឆ្លងកាត់កំណត់ត្រាដ៏គ្រោះថ្នាក់នៅក្នុងប្រទេសសិង្ហបុរី៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
