បឹងទំនាបនៅតាមតំបន់ភាគខាងត្បូងប្រទេសអ៊ីរ៉ាក់ កំពុងរីងហួតស្ងួតអស់ ហើយទឹកបឹកបានស្រក ប្រែជារីងខះ ក្រោយគ្រោះរាំងស្ងួតអស់រយៈពេលជាច្រើនឆ្នាំ ហើយត្រីក៏លែង​មាន​ទៀត​ដែរ។ 

ដោយឡែកជីវិតរស់នៅប្រចាំថ្ងៃដែលមានអាយុកាសរាប់សតវត្សរ៍មកហើយនោះ ក៏រងការគំរាមកំហែងផងដែរ។ ក្រុមប្រជានេសាទនៅទីនេះ និយាយថា ពួកគេដូចត្រូវគេច្របាច់ក.ឲ្យស្លាប់ ហើយ​ពួកគេសួរថាតើកន្លែងណាដែលពួកយើងត្រូវទៅនៅពេលឥឡូវនេះ ។ 

លោក​ Ali Hakim គឺអ្នកនេសាទម្នាក់និយាយថា ធ្លាប់តែមានត្រីច្រើនណាស់ ប៉ុន្តែឥឡូវលែងមានទៀតហើយ ដោយសារតែខ្វះទឹក រីងខះ ដោយសារតែទំនប់ដែលត្រូវបានគេកសាង។ អ្វីៗ​គ្រប់​បែបយ៉ាង ត្រី និងស្មៅ បានងាប់អស់ ។ ត្រីតូចៗទាំងនេះ ប្រើបានត្រឹមតែជាចំណីសត្វប៉ុណ្ណោះ ។ 

លោក Hakim បន្តថា ក្របីរបស់លោកជាច្រើនក្បាល បានងាប់អស់ដោយសារតែគ្មានចំណីស៊ី ។ ទឹកបានរីងអស់ ដោយសារតែទំនប់ដែលពួកគេបិទទឹក ធ្វើឲ្យទឹករីង គ្មានទឹកហូរខ្លាំងទេ ។ គ្មានព្រៃ ឬស្មៅនោះទេ ស្មៅគឺថ្លៃខ្លាំងណាស់ ៕