ក្រុមជីវពលប្រឆាំងនឹងវិមានក្រឹមឡាំង គឺអង្គភាពស្ម័គ្រចិត្តរុស្ស៊ី (RVC) បានប្រកាសនៅក្នុងវីដេអូដែលបាន ចេញផ្សាយកាលពីថ្ងៃចន្ទថា ពួកគេដណ្តើមបានការគ្រប់គ្រងទីក្រុង Novaya Tavolzhanka ស្ថិតនៅតំបន់ព្រំដែន Belgorod របស់រុស្ស៊ី។

លោក Denis Kapustin គឺជាមេបញ្ជាការ RVC និយាយនៅក្នុងការចេញផ្សាយវីដេអូថា ក្រុមអ្នកប្រយុទ្ធ RVC គ្រប់គ្រងបានទីក្រុង Novaya Tavolzhanka។ លោកចង់រំឭកដល់ប្រជាពលរដ្ឋរុស្ស៊ីរាល់រូបថា នេះមិនមែនជាភូមិដែលត្រូវបានគេបោះបង់ចោលនោះទេ ប៉ុន្តែគឺជាទីកន្លែងមួយដែលមានមនុស្សរស់នៅ ៥ពាន់នាក់។ ឥឡូវគ្មាននរណាម្នាក់នៅទីនេះទេ លើកលែងតែក្រុមអ្នកប្រយុទ្ធ RVC។

ទីភ្នាក់ងារព័ត៌មានរ៉យទ័រ អាចបញ្ជាក់ផ្ទៀងផ្ទាត់បានថាទីតាំងនោះ គឺជាទីក្រុង Novaya Tavolzhanka ដោយសារទីតាំងអគារ ផ្លូវ ការរចនាដំបូលផ្ទះ និងភ្នំដែលគេមើលឃើញនៅខាងក្រោយនៅក្នុងវីដេអូ ដោយពួកគេផ្គូរផ្គងជាមួយរូបភាពផ្កាយរណបនៅតំបន់នោះ។

ទោះបីជាយ៉ាងណាក៏ដោយ ទីភ្នាក់ងារព័ត៌មានរ៉យទ័រ ពុំអាចបញ្ជាក់ផ្ទៀងផ្ទាត់ដោយឯករាជ្យបានឡើយពីពេលវេលានៃការថតវីដេអូមួយនេះ។

សេចក្តីថ្លែងការណ៍បែបនេះ បានកើតមាន ក្រោយក្រសួងការពារជាតិរុស្ស៊ី និយាយថា កាលពីថ្ងៃអាទិត្យ ពួកគេបានរុញច្រានក្រុមជីវពលអ៊ុយក្រែន ដែលព្យាយាមឆ្លងកាត់ចូលទៅក្នុងតំបន់ព្រំដែន Belgorod ស្ថិតនៅភាគខាងត្បូងប្រទេសរុស្ស៊ី ហើយនិងបានសម្លាប់ក្រុមអ្នកប្រយុទ្ធជាង ១០នាក់៕