ប្រទេសអ៊ីរ៉ង់ បានបើកឡើងវិញជាផ្លូវការស្ថានទូតរបស់ខ្លួន ក្នុងរដ្ឋធានីរីយ៉ាត ប្រទេសអារ៉ាប៊ីសាអូឌីត កាលពីថ្ងៃអង្គារ បន្ទាប់ពីមានកិច្ចព្រមព្រៀងមួយដើម្បីបង្កើតទំនាក់ទំនងឡើងវិញ និងបន្ធូបន្ថយការប្រជែងគ្នាមានកើតមានជាយូរមកហើយ ដែលបានបង្កឲ្យមានជម្លោះនៅទូទាំងមជ្ឈឹមបូព៌ា។

ពិធីមួយត្រូវបានធ្វើឡើងនៅក្នុងបរិវេណរបស់ស្ថានទូត ដោយមានអ្នកការទូតនិងមន្ត្រីរាប់សិបនាក់ ចូលរួមការបើកឡើងវិញបេសកកម្មការទូតជាលើកដំបូងក្នុងរយៈពេល៧ឆ្នាំមកនេះ។

អនុរដ្ឋមន្ត្រីការបរទេសទទួលបន្ទុកកិច្ចការកុងស៊ុលរបស់ប្រទេសអ៊ីរ៉ង់លោក Alireza Bikdeli បាននិយាយថា យើងគិតថាថ្ងៃនេះជាថ្ងៃដ៏មានសារៈសំខាន់ក្នុងទំនាក់ទំនងរវាងសាធារណៈរដ្ឋឥស្លាមអ៊ីរ៉ង់ និងប្រទេសអារ៉ាប៊ីសាអ៊ូឌីត។

លោក Bikdeli និយាយនៅក្នុងសុន្ទរកថា អំឡុងពិធីនោះថា តំបន់នេះនឹងឈានទៅមុខឆ្ពោះទៅរកកិច្ចសហប្រតិបត្តិការកាន់តែប្រសើរ និងរួមគ្នាដើម្បីទទួលបានភាពរីកចម្រើន និងវិបុលភាពប្រកបដោយស្ថិរភាព។

កាលពីខែមីនា ប្រទេសអ៊ីរ៉ង់ និងប្រទេសអារ៉ាប៊ីសាអ៊ូឌីត បានឯកភាពក្នុងកិច្ចព្រមព្រៀងមួយដែលសម្របសម្រួលដោយប្រទេសចិន ដើម្បីបញ្ចប់ភាពប្រះឆាផ្នែកការទូត និងបានបង្កើតទំនាក់ទំនងឡើងវិញបន្ទាប់ពីរយៈពេលជាច្រើនឆ្នាំនៃអរិភាព ដែលបានបង្កគ្រោះថ្នាក់ដល់ស្ថិរភាពតំបន់ រួមទាំងនៅក្នុងប្រទេសយ៉េម៉ែន ស៊ីរី និងលីបង់។ កិច្ចព្រមព្រៀងនេះ បានបង្ហាញពីឥទ្ធិពលដែលកំពុងកើនឡើងរបស់ប្រទេសចិន នៅក្នុងតំបន់មជ្ឈឹមបូព៌ា។

ប្រទេសអារ៉ាប៊ីសាអ៊ូឌីត ប្រកាន់និកាយស៊ុននី បានកាត់ផ្តាច់ទំនាក់ទំនងជាមួយប្រទេសអ៊ីរ៉ង់នីកាយស៊ីអ៊ីត បន្ទាប់ការសម្រុកចូលស្ថានទូតរបស់ខ្លួនក្នុងទីក្រុងតេអេរ៉ង់ ក្នុងឆ្នាំ២០១៦ បន្ទាប់ពីជម្លោះជុំវិញការកាត់ទោសប្រហារជីវិតបព្វជិតមូស្លីមនីកាយស៊ីអ៊ីតម្នាក់។

ទំនាក់ទំនងបានចាប់ផ្តើមធ្លាក់ចុះកាលពីមួយឆ្នាំមុន បន្ទាប់ពីប្រទេសអារ៉ាប៊ីសាអ៊ូឌីត និងប្រទេសអារ៉ាប់រួម ធ្វើអន្តរាគមន៍នៅក្នុងសង្គ្រាមនៅយ៉េម៉ែន ជាទីដែលចលនាក្រុមហ៊ូធីដែលមានសម្ព័ន្ធភាពជាមួយអ៊ីរ៉ង់ បានបណ្តេញចេញរដ្ឋាភិបាលគាំទ្រដោយប្រទេសអារ៉ាប៊ីសាអ៊ូឌីត និងដណ្តើកាន់កាប់រដ្ឋធានីសាណា។