អ៊ីស្រាអែល៖ នគរបាលអ៊ីស្រាអែលដែលបានបាញ់ឧស្ម័នបង្ហៀរទឹកភ្នែក គ្រាប់បែកផ្សែង និងគ្រាប់កាំភ្លើងជ័រ បានប៉ះទង្គិចជាមួយប្រជាជនប៉ាឡេស្ទីនកំពុងគប់ដុំថ្ម នៅកន្លែងពិសិដ្ឋដ៏សំខាន់នៃក្រុង Jerusalem កាលពីថ្ងៃចន្ទ ជាការប្រឈមមុខគ្នាចុងក្រោយបង្អស់ ដែលបានគំរាមជំរុញឱ្យទីក្រុងដែលមានជម្លោះស្រាប់ ឈានទៅរកជម្លោះកាន់តែធំថែមទៀត។
អ្នកសារព័ត៌មាន AP ម្នាក់ដែលនៅកន្លែងកើតហេតុបាននិយាយថា បំពង់ឧស្ម័នបង្ហៀរទឹកភ្នែក និងគ្រាប់បែកផ្សែងជាច្រើនបានធ្លាក់ក្នុងវិហារ Al-Aqsa ដែលជាកន្លែងដ៏ពិសិដ្ឋបំផុតមួយ ក្នុងចំណោមទីសក្ការៈដ៏បរិសុទ្ធជាច្រើនរបស់សាសនាអ៊ីស្លាម ស្របពេលដែលនគរបាល និងក្រុមអ្នកតវ៉ាបានប្រឈមមុខគ្នា នៅខាងក្នុងបរិវេណដែលមានជញ្ជាំងព័ទ្ធជុំវិញនោះ។ យោងតាមអឌ្ឍច័ន្ទក្រហមប៉ាឡេស្ទីនឲ្យដឹងថា ប្រជាជនប៉ាឡេស្ទីនចំនួន ៣០៥នាក់បានរងរបួសក្នុងនោះមាន ២២៨នាក់ដែលបានដឹកទៅសម្រាកព្យាបាលនៅមន្ទីរពេទ្យ និងគ្លីនិកដើម្បីព្យាបាល។ អ្នករងរបួស ៧នាក់ស្ថិតក្នុងស្ថានភាពធ្ងន់ធ្ងរ។ នគរបាលបាននិយាយថា មន្ត្រីចំនួន ២១នាក់បានរងរបួសក្នុងនោះមាន ៣នាក់ត្រូវបានបញ្ជូនទៅព្យាបាលនៅមន្ទីរពេទ្យ។ ក្រុមគ្រូពេទ្យអ៊ីស្រាអែលបាននិយាយថា ជនស៊ីវិលអ៊ីស្រាអែល ៧នាក់ក៏បានរងរបួសដែរ។
ការប្រឈមមុខគ្នានេះគឺជាឧបទ្ទវហេតុចុងក្រោយបំផុត បន្ទាប់ពីមានភាពតានតឹងកាន់តែខ្លាំងឡើងរវាងពលរដ្ឋប៉ាឡេស្ទីន និងកងទ័ពអ៊ីស្រាអែលនៅក្នុងទីក្រុងបុរាណ Old City របស់ទីក្រុង Jerusalem ដែលជាចំណុចងាយផ្ទុះជាជម្លោះរបស់ពួកគេ។ មានការប៉ះទង្គិចគ្នាស្ទើរតែពេញមួយយប់ ក្នុងអំឡុងខែដ៏ពិសិដ្ឋនៃបុណ្យរ៉ាម៉ាដានរបស់ពលរដ្ឋម៉ូស្លីម ដែលជាពេលវេលានៃភាពចម្រូងចម្រាសបំផុតខាងសាសនា។ កាលពីថ្ងៃចន្ទ ត្រូវបានគេរំពឹងថានឹងមានភាពតានតឹងកាន់តែខ្លាំងថែមទៀត ចាប់តាំងពីអ៊ីស្រាអែលបានចាត់ទុកជាថ្ងៃទិវា Jerusalem Day ដើម្បីអបអរសាទរការដណ្ដើមគ្រប់គ្រងរបស់ពួកគេលើដែនដីទីក្រុង Jerusalem ខាងកើតក្នុងសង្គ្រាមមជ្ឈិមបូព៌ាឆ្នាំ១៩៦៧៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
