​រដ្ឋមន្ត្រីការបរទេស​ម៉ិ​ក​ស៊ិ​កលោក Marcelo Ebrard ដែលជា​គូប្រជែង​ឈានមុខ​គេ​មួយ​ក្នុង​បេក្ខភាព​មេដឹកនាំ​បន្ទាប់​របស់​ប្រទេស​នេះ បាន​និយាយ​កាលពី​ថ្ងៃ​អង្គារ (៦ មិថុនា​)​ថា លោក​នឹង​លាលែង​ពី​តំណែង​នៅ​សប្តាហ៍​ក្រោយ ដើម្បី​ផ្តោតលើ​ការយក​ឈ្នះ​ការតែងតាំង​ពី​គណបក្សកាន់អំណាច​សម្រាប់​ការបោះឆ្នោត​ប្រធានាធិបតី​នៅ​ឆ្នាំក្រោយ​។​

​លោក Ebrard ដែលជា​អតីត​អភិបាលរដ្ឋ​ធានី​ម៉ិ​ក​ស៊ិ​កូ​ស៊ី​ធី ប្រទេស​ម៉ិ​ក​ស៊ិ​ក កំពុង​ប្រកួតប្រជែង​ដើម្បី​ស្នង​តំណែង​ប្រធានាធិបតី​ពី​លោក Andres Manuel Lopez Obrador ជា​អ្នកដឹកនាំ​ប្រកាន់យក​ស្តង់ដារ​នៃ​គណបក្ស​ចលនា​សង្គ្រោះ​ជាតិ​ឆ្វេងនិយម (MORENA) ដែល​បច្ចុប្បន្ននេះ​គ្រប់គ្រង​នយោបាយ​ជាតិ​។​

​ការស្ទង់មតិ​បង្ហាញថា​លោក Ebrard គឺជា​បេក្ខភាព​ប្រជែង​ឈានមុខ​គេ​មួយរូប​ដើម្បី​ស្នង​តំណែង​លោក Lopez Obrador ដែល​តាមច្បាប់​អាច​កាន់តំណែង​ប្រធានាធិបតី​បានតែ ៦ ឆ្នាំ​ប៉ុណ្ណោះ ទោះបីជា​ការស្ទង់មតិ​ថ្មីៗ​ភាគច្រើន​មាន​ទំនោរ​គាំទ្រ​អភិបាលក្រុង​ម៉ិ​ក​ស៊ិ​ក​បច្ចុប្បន្ន​លោកស្រី Claudia Sheinbaum បន្តិចបន្តួច​ក៏ដោយ​។​

​ការបោះឆ្នោត​ប្រធានាធិបតី​នឹង​ប្រព្រឹត្តទៅ​នៅ​ខែមិថុនា ឆ្នាំ២០២៤​។ គណបក្ស​ចលនា​សង្គ្រោះ​ជាតិ​ឆ្វេងនិយម (MORENA) នឹង​ជ្រើសរើស​បេក្ខភាព​ប្រធានាធិបតី​របស់ខ្លួន​ដោយ​ដំណើរការ​បោះឆ្នោត ទោះបីជា​ព័ត៌មាន​លម្អិត​មិនទាន់​ត្រូវបាន​បញ្ចប់​ក៏ដោយ​។ គណបក្ស MORENA ទទួលបាន​ការគាំទ្រ​យ៉ាងខ្លាំង​ក្នុងការ​ឈ្នះឆ្នោត​ប្រធានាធិបតី ដែល​ជំរុញ​ដោយ​ប្រជាប្រិយភាព​របស់លោក Lopez Obrador ៕​