សេអ៊ូល៖ ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃពុធ (៧ មិថុនា) នេះថា ក្រុមយុវជនកូរ៉េខាងជើងមួយក្រុមបានបរិច្ចាគជើងទម្របាញ់រ៉ូកែតដល់យោធាក្នុងការបង្ហាញពីភាព "ស្នេហាជាតិដ៏ក្លៀវក្លា" ខណៈដែលរដ្ឋឯកោមួយនេះប្រឈមមុខនឹងអ្វីដែលខ្លួនមើលឃើញថាជាការគំរាមកំហែងពីបរទេស។
ការបរិច្ចាគគ្រឿងយុទ្ធោបករណ៍នេះ បានធ្វើឡើងនៅក្នុងពិធីមួយកាលពីថ្ងៃអង្គារ ខណៈដែលសហភាពកុមារកូរ៉េ (KCU) ដែលជាក្រុមយុវជននយោបាយបានប្រារព្ធខួបលើកទី ៧៧ របស់ខ្លួន។
ក្នុងរយៈពេលប៉ុន្មានខែថ្មីៗនេះ កូរ៉េខាងជើងបានបង្កើនកិច្ចខិតខំប្រឹងប្រែងឃោសនា និងការផ្ញើសារជាសាធារណៈ រួមទាំងការរៀបចំពិធីជួបជុំដែលរូបសំណាករបស់មេដឹកនាំកូរ៉េខាងត្បូង និងអាមេរិក ត្រូវបានយកមកដុតបំផ្លាញ ខណៈកម្មវិធីមីស៊ីល និងនុយក្លេអ៊ែររបស់ប្រទេសនេះរុញឲ្យមានការប្រកាសអាសន្ននៅក្រៅប្រទេស។
កូរ៉េខាងជើងបានផ្គើននឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិតាមរយៈការបាញ់សាកល្បងមីស៊ីលផ្សេងៗ រួមទាំងមីស៊ីលបាលិស្ទិកអន្តរទ្វីបដ៏ធំបំផុតរបស់ខ្លួននៅឆ្នាំនេះ។
ប្រព័ន្ធផ្សព្វផ្សាយ KCNA បានរាយការណ៍ថា ពិធីប្រារព្ធខួបកាលពីថ្ងៃអង្គារមានការចូលរួមដោយក្រុមមន្ត្រីជាន់ខ្ពស់គណបក្សកាន់អំណាច។ KCNA មិនបាននិយាយពីមធ្យោបាយក្នុងការរៃអង្គាសថវិកាសម្រាប់គ្រឿងយុទ្ធោបករណ៍នោះទេ។ ជើងទម្រសម្រាប់បាញ់រ៉ូកែតដែលបានបរិច្ចាគត្រូវបានគេដាក់ឈ្មោះថា "Sonyeon" ដែលមានន័យក្នុងភាសាកូរ៉េថាក្មេងប្រុស ទោះបីជាសមាជិកក្រុមយុវជនរួមមានក្មេងប្រុស និងក្មេងស្រីក៏ដោយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
