ក្រុមមន្រ្តីក្នុងស្រុក បាននិយាយកាលពីថ្ងៃអង្គារថា មនុស្ស ៣២នាក់ បានស្លាប់នៅតំបន់ភាគខាងលិចរុស្ស៊ី ក្រោយផឹកស្រាផ្លែប៉ោបក្លែងក្លាយ និងមនុស្សរាប់សិបនាក់ផ្សេងទៀត ធ្លាក់​ខ្លួន​ឈឺ។ 

ក្រសួងសុខាភិបាលក្នុងតំបន់ Ulyanovsk ជាទីដែលរាយការណ៍ករណីពុលស្រាផ្លែប៉ោមលើកដំបូងនោះ បាននិយាយថា មនុស្ស ២០នាក់ បានស្លាប់ ក្រោយផឹកស្រាផ្លែប៉ោមម៉ាក Mister Cider។ 

ក្រុមអាជ្ញាធរនៅក្នុងតំបន់ Samara, តំបន់ Nizhny Novgorod និង Udmurtia និយាយថា មនុស្សសរុប ១២នាក់ បានស្លាប់ផងដែរនៅក្នុងតំបន់របស់ពួកគេ។  ដោយ​ឡែក មនុស្សរាប់សិប​នាក់​ផ្សេងទៀត ត្រូវបានគេរាយការណ៍ថា បានធ្លាក់ខ្លួនឈឺ នៅតាមតំបន់ជាច្រើន ក្រោយទទួលទានស្រាផ្លែប៉ោងក្លែងក្លាយនេះ ។ 

ក្រុម​អាជ្ញាធរ បានឃាត់ខ្លួនបុរសម្នាក់ ពាក់ព័ន្ធនឹងករណីសង្ស័យថាបានធ្វេសប្រហែសជាហេតុបណ្តាលឲ្យមនុស្សស្លាប់យ៉ាងច្រើនបែបនេះ ហើយនិងបាន​បញ្ជាឲ្យបញ្ឈប់ការលក់​ទំនិញ​ប៉ះ​ពាល់ទាំងនេះ ។  

សារព័ត៌មានរុស្ស៊ី បានរាយការណ៍ថា ស្រាផ្លែប៉ោមមានបរិមាណមេតាណុលអាចបណ្តាលឲ្យស្លាប់បាន មានសារធាតុពុលច្រើនជាងអេតាណុល ដែលរកឃើញ​នៅក្នុងភេសជ្ជៈ​មាន​ជាតិ​អាល់កុលធម្មតា។  

 សូមបញ្ជាក់ថា រុស្ស៊ី បានរឹតបន្តឹងការគ្រប់គ្រងការផលិត និងលក់ជាតិអាកុល ក្រោយមនុស្ស ៧៧នាក់ ស្លាប់ដោយសារផឹកស្រាបិទលួចលាក់ថោកៗនៅតំបន់ Siberiaកាលពីឆ្នាំ២០១៦ ៕.