កសិករម្នាក់ឈ្មោះ Chen បាននិយាយថា ពន្លកស្រូវសាលីរបស់ខ្លួនមិនស័ក្តិសមសម្រាប់ការប្រមូលផលទៀតទេ។ លោក Chen ដាំស្រូវសាលីប្រហែល ២ ហិចតាជារៀងរាល់​ឆ្នាំនៅ​ក្នុង​ខេត្ត Henan ភាគកណ្តាលរបស់ប្រទេសចិន ដែលជាធម្មតាខេត្តនេះ ជាតំបន់ផលិតគ្រាប់ធញ្ញជាតិដ៏សំខាន់សម្រាប់អ្នកប្រើប្រាស់ស្រូវសាឡីដ៏ធំបំផុតរបស់ពិភពលោក។

ប៉ុន្តែ ប៉ុន្មានថ្ងៃដែលមានភ្លៀងធ្លាក់ជាបន្តបន្ទាប់នៅមុនការប្រមូលផលឆ្នាំនេះ បានធ្វើឱ្យវាលស្រែសើម និងបង្កឱ្យស្រូវសាលីដុះលូតលាស់ឆាប់រហ័សពេក​បណ្ដាលឱ្យពិបាក​ក្នុងការប្រមូល​ផល ព្រមទាំងគុណភាពស្រូវសាលីលែងសមស្របសម្រាប់ការធ្វើមី ឬម្សៅនំប៉័ង។

អ្នកបើកម៉ាស៊ីនប្រមូលផលដំណាំដែលកំពុងធ្វើប្រតិបត្តិការនៅកសិដ្ឋានក្បែរនោះបាននិយាយថា ប្រហែលមួយភាគបីនៃស្រូវសាឡីដែលដាំដុះនៅទូទាំងខេត្ត Henan ភាគខាងត្បូង​បាន​ចេញ​ពន្លក។ ស្រូវសាលីចេញពន្លកគឺមិនស័ក្តិសមសម្រាប់ការប្រើប្រាស់របស់មនុស្សទេ ហើយជាធម្មតាវាអាច​ត្រូវបានលាយ​បញ្ចូល​គ្នាជាមួយ​នឹងគ្រាប់​ធញ្ញជាតិ ដែលមានគុណភាព​ល្អជាង​នេះ និងធ្វើជាចំណីសត្វ។

លោក Darin Friedrichs សហស្ថាបនិកក្រុមហ៊ុនប្រឹក្សា Sitonia Consulting ដែលមានមូលដ្ឋាននៅទីក្រុងសៀងហៃបាននិយាយថា ឃ្លាំងស្តុកធំៗដែលរក្សាទុកដោយប្រទេសចិន​គួរតែ​ការ​ពារ​​ប្រឆាំង​នឹងផលប៉ះពាល់​ណាមួយលើតម្លៃម្ហូបអាហារ។ លោក Friedrichs បានបន្ថែមថា ការខូចខាត​ធ្ងន់ធ្ងរអាចជំរុញឱ្យប្រទេសចិន​ទិញស្រូវសាលី ដែលមាន​គុណភាពល្អ​ជាងមុន​ពីទីផ្សារ​ពិភពលោក។

រដ្ឋមន្ត្រីក្រសួងកសិកម្មចិនលោក Tang Renjian បានចុះទៅពិនិត្យតំបន់ Zhumadian និងតំបន់រងផលប៉ះពាល់ផ្សេងទៀតក្នុងសប្តាហ៍នេះ ហើយបានជំរុញឱ្យមាន "វិធានការពិសេស" ដើម្បីប្រមូលផលស្រូវសាលី នេះបើយោងតាមសេចក្តីថ្លែងការណ៍របស់ក្រសួងកសិកម្មកាលពីថ្ងៃចន្ទ។ ក្រសួងហិរញ្ញវត្ថុចិនបាននិយាយកាលពីថ្ងៃចន្ទថា ខ្លួននឹងបែងចែកថវិកាចំនួន ២០០ លានយ័ន (២៨,១១ លានដុល្លារ) ដើម្បីជួយខេត្ត Henan ទប់ទល់នឹងការខាតបង់ស្រូវសាឡីដែលបណ្តាលមកពីភ្លៀងធ្លាក់ខ្លាំងនេះ៕