អ៊ុយក្រែន ៖ ក្រុមមន្ត្រីអ៊ុយក្រែនបាននិយាយថា មនុស្សចំនួន ៤២.០០០ នាក់កំពុងប្រឈមមុខនឹងគ្រោះទឹកជំនន់ បន្ទាប់ពីទំនប់​ដ៏ធំមួយនៅតំបន់ Kherson ភាគខាងត្បូងអ៊ុយក្រែនត្រូវបានខូចខាតយ៉ាងធ្ងន់ធ្ងរកាលពីព្រឹកថ្ងៃអង្គារ។

មនុស្សមួយចំនួនដែលកំពុងទន្ទឹងរង់ចាំការជួយសង្គ្រោះនៅតំបន់ដែលរងផលប៉ះពាល់ បានបង្ខំចិត្ត​ដេកនៅ​លើដំបូលផ្ទះរបស់ពួកគេ ឬនៅលើដើមឈើដោយសារតែទឹកបានជន់លិចខ្លាំង។ ប្រធានាធិបតីអ៊ុយក្រែនលោក Volodymyr Zelensky បានព្រមានថាមនុស្ស​រាប់សែននាក់ត្រូវបានទុកចោលដោយគ្មានសូម្បីតែទឹកផឹក។

អ៊ុយក្រែន និងរុស្ស៊ីបានដាក់ការស្តីបន្ទោសគ្នាទៅវិញទៅមកចំពោះការបាក់ទំនប់នេះ ដោយប្រធានាធិបតី Zelensky បានចោទប្រកាន់រុស្ស៊ី​ថាបានបំផ្ទុះ "គ្រាប់បែកមហាប្រល័យលើបរិស្ថាន" ។

រុស្ស៊ីអះអាងថា អ៊ុយក្រែនបានធ្វើការវាយប្រហារលើទំនប់វារីអគ្គិសនីនោះ​ដើម្បីបង្អាក់នូវអ្វីដែលខ្លួន​និយាយថា​ការបរាជ័យក្នុងការវាយបករបស់រដ្ឋធានីគីវ៕