អន្តរជាតិ ៖ ក្រុមអ្នកវិទ្យាសាស្ត្រព្រមានថា តំបន់អាក់ទិកអាចលែងមានទឹកកកសមុទ្រ ដែលលឿនជាងការ​ព្យាករទុកប្រហែល មួយទសវត្សរ៍ ពោលគឺជាសញ្ញាព្រមានច្បាស់លាស់មួយទៀតដែលថា វិបត្តិអាកាសធាតុកំពុងកើត ឡើងលឿនជាង ការរំពឹងទុក ខណៈដែលពិភពលោកនៅតែបន្តបញ្ចេញការបង្កកង្វក់ ដែលនាំឲ្យភព​ផែនដីមាន​កម្ដៅរឹតតែខ្ពស់។

ការសិក្សាថ្មីមួយដែលបានចេញផ្សាយ កាលពីថ្ងៃអង្គារ នៅក្នុងទស្សនាវដ្ដី Nature Communications បានរកឃើញថា ទឹកកកសមុទ្រអាក់ទិកអាចរលាយបាត់ទាំងស្រុង ក្នុងអំឡុងខែកញ្ញារហូតដល់ដើមទសវត្សរ៍ឆ្នាំ២០៣០។ អ្នកវិទ្យាសាស្ត្របានឲ្យដឹងថា ទោះបីជាបច្ចុប្បន្ននេះពិភពលោកកាត់បន្ថយការបង្កកង្វក់ ដែលនាំឲ្យភពផែនដី មានកម្ដៅរឹតតែខ្ពស់ក៏ដោយ ក៏តំបន់អាក់ទិក នៅតែអាចមើលឃើញរដូវក្ដៅ ដែលគ្មានទឹកកកសមុទ្រ នៅទសវត្សរ៍ឆ្នាំ២០៥០។

ក្រុមអ្នកស្រាវជ្រាវ បានវិភាគលើការប្រែប្រួលពីឆ្នាំ១៩៧៩ ដល់ឆ្នាំ២០១៩ ដោយប្រៀបធៀបទិន្នន័យផ្កាយរណប និងគំរូអាកាសធាតុខុសៗគ្នា ដើម្បីវាយតម្លៃពីរបៀបដែលទឹកកកសមុទ្រអាកទិក កំពុងមានការប្រែប្រួល។

ទឹកកកតំបន់អាក់ទិក កើនឡើងខ្លាំងក្នុងរដូវរងា ហើយបន្ទាប់មករលាយក្នុងរដូវក្តៅ ដែលជាធម្មតាធ្លាក់ដល់ កម្រិតទាបបំផុត នៅក្នុងខែកញ្ញា មុនពេលវដ្ដនៃរដូវថ្មី ចាប់ផ្តើមម្តងទៀត៕