រុស្ស៊ី ៖ ស្ថានទូតរុស្ស៊ីប្រចាំនៅសហរដ្ឋអាមេរិក បាននិយាយ នៅថ្ងៃពុធ (ទី៧ ខែមិថុនា)នេះ ថា របាយការណ៍​ដែលសហរដ្ឋអាមេរិក បានដឹងពីផែនការរបស់អ៊ុយក្រែន ក្នុងការវាយប្រហារបំពង់បង្ហូរឧស្ម័នធម្មជាតិ Nord Stream គឺជាផ្នែកមួយនៃការប៉ុនប៉ុង ដែលជួយសម្រួលដោយលោកខាងលិច ដើម្បីបំភ័ន្តពិភពលោក ឲ្យយល់ខុសការពិត។

សារព័ត៌មាន Washington Post បានចុះផ្សាយ កាលពីថ្ងៃអង្គារ (ទី៦ ខែមិថុនា) ដោយដកស្រង់ព័ត៌មានបែកធ្លាយ ដែលបង្ហោះតាមអ៊ីនធឺណិតថា ភ្នាក់ងារស៊ើបការសម្ងាត់អាមេរិក (CIA) បានដឹងកាលពីខែមិថុនាឆ្នាំមុន តាមរយៈទីភ្នាក់ងារចារកម្មអឺរ៉ុបថា ក្រុមប្រតិបត្តិការពិសេសរបស់អ៊ុយក្រែន៦នាក់ មានគោលបំណងបំផ្ទុះគម្រោងរុស្ស៊ី ទៅកាន់អាល្លឺម៉ង់។

អ្នកការទូតរុស្ស៊ីលោក Andrey Ledenev ត្រូវបានដកស្រង់សម្តី ដែលបាននិយាយក្នុងសារនៅលើបណ្តាញ​សង្គម​ផ្ញើសារ Telegram របស់ស្ថានទូតថា៖ «យុទ្ធនាការសម្របសម្រួលរបស់លោកខាងលិច ដែលដឹកនាំដោយ​សហរដ្ឋអាមេរិក ដើម្បីធ្វើឲ្យសហគមន៍អន្តរជាតិមានការភ័ន្តច្រឡំ ត្រូវបានដេរភ្ជិតដោយខ្សែអំបោះពណ៌ស»។

លោក Ledenev បានបន្ថែមថា៖ «ហេតុផលសម្រាប់ការរីកសាយនៃទ្រឹស្តី និងកំណែថ្មី ដែលគាំទ្រដោយទិន្នន័យ​សម្ងាត់ដ៏ល្បីល្បាញនៃសហគមន៍ស៊ើបការណ៍សម្ងាត់ក្នុងតំបន់ គឺសាមញ្ញណាស់ រហូតមើលឃើញចំណុច​នៃការលើកឡើងដដែលនេះ»។

ការបំផ្ទុះនៅក្រោមទឹកជាច្រើនគ្រាប់ បានធ្វើឲ្យធ្លាយបំពង់បង្ហូរ Nord Stream 1 និងបំពង់បង្ហូរទើបសាងសង់ថ្មី Nord Stream 2 ដែលភ្ជាប់រុស្ស៊ី និងអាល្លឺម៉ង់ឆ្លងកាត់សមុទ្របាល់ទិក ក្នុងខែកញ្ញា ឆ្នាំ២០២២។ ការផ្ទុះនោះ បានកើតឡើងនៅក្នុងតំបន់សេដ្ឋកិច្ចនៃប្រទេសស៊ុយអែត និងដាណឺម៉ាក៕