អ៊ីស្រាអែល៖ ការប៉ះទង្គិចគ្នាជាច្រើនបានផ្ទុះឡើង បន្ទាប់ពីកងកម្លាំងអ៊ីស្រាអែល បានបង្កើនការវាយឆ្មក់ដ៏កម្រចូលក្នុងទីក្រុង Ramallahរបស់ជនជាតិប៉ាឡេស្ទីន នៅក្នុងតំបន់ West Bank ដែលត្រូវបានគ្រប់គ្រងដោយអ៊ីស្រាអែល នៅព្រឹកថ្ងៃព្រហស្បតិ៍នេះ ជាអ្វីដែលខាងយោធាបាននិយាយថាជាប្រតិបត្តិការមួយក្នុងការកម្ទេចចោលផ្ទះសម្បែងរបស់ពួកសកម្មប្រយុទ្ធ។ 

ភ្នាក់ងារសារព័ត៌មាន Reuters បាននិយាយថា ក្បួនយោធាដ៏ធំមួយបានទៅដល់ទីក្រុង Ramallah ជាកន្លែងដែលរដ្ឋាភិបាលប៉ាឡេស្ទីន កំពុងដឹកនាំការប្រមូលផ្ដុំជនជាតិប៉ាឡេស្ទីន រាប់រយនាក់ក្នុងតំបន់នោះ។

សាក្សីឃើញហេតុការណ៍ បាននិយាយថា យុវជនប៉ាឡេស្ទីនមួយចំនួន បានគប់ដុំថ្មទៅលើកងកម្លាំងអ៊ីស្រាអែល ដែលបានបាញ់គ្រាប់កាំភ្លើងគ្រាប់ពិត គ្រាប់បែកផ្សែង និងឧស្ម័នបង្ហូរទឹកភ្នែកទៅលើក្រុមនេះ ។ ធុងសំរាមនានា ត្រូវបានដុតដើម្បីបិទផ្លូវ ខណៈស៊ីរ៉ែនរថយន្តគិលានសង្រ្គោះបានបន្លឺឡើង។ 

អាជ្ញាធរសុខាភិបាលប៉ាឡេស្ទីន បាននិយាយថា មនុស្ស៦នាក់ត្រូវបានបញ្ជូនទៅកាន់មន្ទីរពេទ្យព្យាបាលរបួស រួមទាំងមនុស្ស៣នាក់រងបួសដោយសារគ្រាប់កាំភ្លើង។ 

ទាហានអ៊ីស្រាអែល បាននិយាយថា កងកម្លាំងរបស់ខ្លួនកំពុងធ្វើប្រតិបត្តិការនៅក្នុងទីក្រុង Ramallah ដើម្បីកម្ទេចចោលជម្រករបស់ក្រុមភេរករ ដែលបានវាយប្រហារដោយគ្រាប់បែកនៅក្នុងទីក្រុង Jerusalem កាលពីខែវិច្ឆិកាឆ្នាំមុន ។ 

ការបំផ្ទុះផ្ទួនគ្នា២លើក ដែលបានសម្លាប់មនុស្ស២នាក់ រួមទាំងយុវជនអ៊ីស្រាអែលសញ្ជាតិកាណាដាម្នាក់ និង បណ្ដាលឲ្យមនុស្ស១៤នាក់ រងរបួស ជាអ្វីដែលនគរបាលបាននិយាយថា ជាការបំផ្ទុះគ្រាប់បែកកែច្នៃ ដែលបាន បំផ្ទុះនៅចំណតរថយន្តក្រុងជិតច្រកចេញទីក្រុងនេះ និងនៅចំណុចផ្លូវបំបែកទៅកាន់តំបន់សាងសង់ទីលំនៅមួយរបស់អ៊ីស្រាអែល ៕