មីយ៉ាន់ម៉ា៖ តារាចម្រៀងជនជាតិមីយ៉ាន់ម៉ា លោកស្រី លីលី ណាំង ច (Lily Naing Kyaw) បានស្លាប់នៅក្នុងមន្ទីរពេទ្យមួយ ក្នុងទីក្រុង Yangon របស់សហភាពមីយ៉ាន់ម៉ា ពោលគឺមួយសប្តាហ៍បន្ទាប់ពីត្រូវបានបាញ់ចំក្បាល ដោយការបាញ់នោះ ត្រូវបានចោទប្រកាន់ទៅលើខ្មាន់កាំភ្លើងប្រឆាំងនឹងរបបយោធា ដែលលោកស្រីគាំទ្រ ហើយមរណភាពរបស់លោកស្រីមិនត្រឹមតែបង្កការភ្ញាក់ផ្អើល សម្រាប់អ្នកគាំទ្រយោធាប៉ុណ្ណោះទេ ប៉ុន្តែក៏សម្រាប់តារាល្បីៗដែលធ្វើការជាមួយប្រព័ន្ធផ្សព្វផ្សាយគាំទ្ររបបយោធាផងដែរ។

តារាវ័យ ៥៨ឆ្នាំរូបនេះ មានទំនាក់ទំនងជិតស្និទ្ធជាមួយបណ្តាមេដឹកនាំជាន់ខ្ពស់របស់របបយោធា ដែលបានដណ្ដើមអំណាចនៅឆ្នាំ២០២១ ដោយបានធ្វើឲ្យប្រទេសនេះធ្លាក់ចូលទៅក្នុងសង្រ្គាម ហើយលោកស្រីក៏ត្រូវបានចោទប្រកាន់ថា ជាអ្នកឲ្យការណ៍ដល់របបនេះផងដែរ។

បុរសពីរនាក់ត្រូវបានចាប់ខ្លួន និងចោទប្រកាន់ពីបទសម្លាប់លោកស្រី ហើយពួកគេត្រូវបានប្រាប់ថា ជាសមាជិកក្រុមឧទ្ទាមក្នុងក្រុងដែលប្រឆាំងនឹងរបបយោធា។ ក្នុងរយៈពេលប៉ុន្មានម៉ោងនៃការចាប់ខ្លួន សាច់ញាតិពីរនាក់របស់ជនសង្ស័យម្នាក់ ក្នុងចំណោមជនជាប់ចោទទាំងពីរ ត្រូវបានសម្លាប់ ដែលទំនងជាការសងសឹក។

ការសម្លាប់លោកស្រី Kyaw គឺជាទង្វើចុងក្រោយបង្អស់នៃការលួចធ្វើឃាតជាបន្តបន្ទាប់លើអ្នកគាំទ្ររដ្ឋាភិបាល ដែលមានកេរ្តិ៍ឈ្មោះល្បីៗ។ បួនថ្ងៃមុនពេលលោកស្រីត្រូវបានបាញ់ប្រហារ លោក Tint Lwin ដែលជាអ្នកជាតិនិយម និងជាអ្នកគាំទ្ររបបយោធាដ៏លេចធ្លោម្នាក់ ត្រូវបានបាញ់ចំក្បាលរហូតដល់ស្លាប់ ខណៈអង្គុយក្នុងហាងតែមួយ នៅទីក្រុង Yangon ដែលជាទីក្រុងដ៏ធំរបស់ប្រទេសនេះ៕