ភ្នំពេញ៖ ក្រុមសិល្បៈនៃក្រសួងវប្បធម៌ និងវិចិត្រសិល្បៈ ក្រសួងការពារជាតិ និងតំណាងក្រុមយុវជនស្ម័គ្រចិត្តប្រមាណជាង៣ ០០០នាក់ បាននាំគ្នាហាត់របាំសិល្បៈទៅតាមផ្នែករៀងៗខ្លួន ដើម្បីត្រៀមបង្ហាញទស្សនីយភាពដ៏អស្ចារ្យ នៅក្នុងថ្ងៃបិទព្រឹត្តិការណ៍ប្រកួតកីឡាអាស៊ានប៉ារ៉ាហ្គេមលើកទី១២។

ក្រុមគ្រូបង្ហាត់សិល្បៈ និងក្រុមសិល្បៈនៃក្រសួងវប្បធម៌ និងវិចិត្រសិល្បៈ ថ្លែងប្រាប់BTV នៅថ្ងៃទី៨ ខែមិថុនា បានថ្លែងថា អស់រយៈពេលជាច្រើនថ្ងៃមកហើយ ដែលក្រុមសិល្បៈទាំងអស់គ្នាបានធ្វើការហ្វឹកហាត់របាំសិល្បៈថ្មីជាច្រើនទម្រង់ និងតាមផ្នែករៀងៗខ្លួន ដើម្បីត្រៀមខ្លួនឡើងបង្ហាញទស្សនីយភាពសិល្បៈខ្មែរ និងអាស៊ាន នៅថ្ងៃបិទព្រឹត្តិការណ៍អាស៊ានប៉ារ៉ាហ្គេម លើកទី១២ នៅល្ងាចថ្ងៃស្អែកនេះនេះ។

ក្រុមយុវជនស្ម័គ្រចិត្តថ្លែងថា មកដល់ពេលនេះ ក្រុមយុវជនស្ម័គ្រចិត្តទាំងអស់ បានហ្វឹកហាត់រួចរាល់ និងត្រៀមខ្លួនឡើងសម្តែងទស្សនីយភាពសិល្បៈជាមួយក្រុមសិល្បៈជាមួយបងៗ ​និងប្អូនៗ ដែល​ជាក្រុមសិល្បៈអាជីព ហើយទស្សនីយភាពថ្ងៃបិទប៉ារ៉ាហ្គេមនោះ នឹងមានភាព​អស្ចារ្យ​ប្លែក​ពីព្រឹត្តិការណ៍បើកបិទ ​ស៊ីហ្គេមកន្លងមក។

ឯកឧត្តម ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ ថ្លែងថា នៅថ្ងៃបិទព្រឹត្តិការណ៍​អាស៊ាន​ប៉ារ៉ាហ្គេមលើកទី១២នេះ នឹងបង្ហាញឈុតឆាកទស្សនីយភាពអស្ចារ្យថ្មីប្លែក ចំនួន៦ទស្សនីយភាព​ធំៗ ហើយ គ្រប់ទស្សនីយភាពទាំងនោះទី១ មានអត្ថន័យចង់បង្ហាញពី​ការចងចាំ​អនុស្សាវរីយ​ល្អ ការទទួលបដិសណ្ឋារកិច្ចល្អ ប្រកបដោយការទទួលខុសត្រូវរបស់កម្ពុជា ក្នុងការចូលរួមព្រឹត្តិការណ៍ស៊ីហ្គេម និងប៉ារ៉ាហ្គេម ទី៣ ការសម្តែងរបស់ក្រុមយុវជនគឺចង់បង្ហាញ​ពីចលនាការងារស្ម័គ្រចិត្តក្នុងចង្វាក់បេះដូងតែមួយ ​ក្នុងទទួលបដិសណ្ឋាកិច្ចជូនភ្ញៀវបានល្អប្រសើរ ទី៣ ​ចង់បង្ហាញពីកម្ពុជា ​សូមអរគុណ ថ្នាក់ដឹកនាំ ប្រតិភូ ​និងអត្តពលិកអាស៊ាន ដែលបានអញ្ជើញ​មកកម្ពុជា​ធ្វើឲ្យព្រឹត្តិការណ៍ប្រកួតកីឡាស៊ីហ្គេម​ និងអាស៊ានប៉ារ៉ាហ្គេមដំណើរការបានជោគជ័យ៕ អត្ថបទ ស៊ុម សុខជា