នៅក្រៅអគារសភា និងតុលាការកំពូលប្រេស៊ីលក្នុងរដ្ឋធានី Brasilia ក្រុមជនជាតិដើមភាគតិចមកពីទូទាំងប្រទេស នាំគ្នាតវ៉ាប្រឆាំងនឹងសេចក្តីស្នើច្បាប់ដែលគំរាមកំហែងដល់ទឹកដីដូនតារបស់ពួកគេ ។

ច្បាប់ដែលត្រូវបានស្នើឡើង នឹងដាក់ចេញការលុបចោលកាលបរិច្ឆេទប្រកាសកម្មសិទ្ធិដីដូនតា កាលពីឆ្នាំ ១៩៨៨ គឺជាឆ្នាំដែលច្បាប់រដ្ឋធម្មនុញ្ញបច្ចុប្បន្នរបស់ប្រទេសមួយនេះ ត្រូវបានអនុម័ត ។ យោងតាមច្បាប់ដែលត្រូវបានស្នើឡើង បានឲ្យដឹងថា សហគមន៍ជនជាតិដើមភាគតិចដែលពុំបានកាន់កាប់ដីរបស់ពួកគេនៅកាលបរិច្ឆេទនោះ នឹងពុំត្រូវអនុញ្ញាតឲ្យធ្វើជាម្ចាស់កម្មសិទ្ធិនោះឡើយ ។

លោក Devanilson Terena គឺជាបាតុករជនជាតិដើមភាគតិចមួយរូប និយាយថា សម្រាប់ជនជាតិដើមភាគតិច ការលុបចោកកាលបរិច្ឆេទនេះ មានន័យស្មើនឹងការប្រល័យពូជសាសន៍ ហើយវានឹងបំផ្លាញប្រវត្តិសាស្រ្តរបស់ពួកយើងទាំងអស់ ។ ក្រុមបាតុករ នាំគ្នាកាន់បដាសរសេរថា ប្រេស៊ីល គឺជាដែនដីជនជាតិដើមភាគតិច ។

នាង Samela Satere គឺជាបាតុករមួយរូបទៀត និយាយថា ជនជាតិដើមភាគតិច រស់នៅទីនេះ តាំងពីមុនប្រទេសកកើតទៅទៀត ។

សូមបញ្ជាក់ថា សេចក្តីស្នើច្បាប់នេះ ត្រូវបានអនុម័តរួចទៅហើយនៅរដ្ឋសភា ហើយនៅរង់ចាំតែការបោះឆ្នោតនៅព្រឹទ្ធសភាប៉ុណ្ណោះ ៕