ប្រធានាធិបតីកូឡុំប៊ីលោក Gustavo Petro បាននិយាយកាលពីថ្ងៃពុធ (៧ មិថុនា)ថា សភារបស់ប្រទេសកូឡុំប៊ីគួរតែអនុម័តកំណែទម្រង់សុខភាព ការងារ និងប្រាក់សោធននិវត្តន៍ ខណៈដែលសភាជាន់ទាបបានថ្លឹងថ្លែងថា តើត្រូវដកសេចក្ដីស្នើច្បាប់សុខភាពដែលនឹងក្លាយជាការបរាជ័យផ្នែកនីតិបញ្ញត្តិដ៏សំខាន់សម្រាប់ពួកឆ្វេងនិយម ដែលបានធ្វើយុទ្ធនាការលើការកែលម្អប្រព័ន្ធដែលរងការគំរាមកំហែងនេះឬយ៉ាងណា។

សំណើសុខភាពដែលរដ្ឋាភិបាលនិយាយថានឹងបង្កើនលទ្ធភាពទទួលបានការថែទាំវេជ្ជសាស្រ្ត ការដំឡើងប្រាក់ខែ និងការប្រយុទ្ធប្រឆាំងនឹងអំពើពុករលួយ បានបណ្តាលឱ្យមានការបែកបាក់ដ៏ធំបំផុតរហូតមកដល់បច្ចុប្បន្ន នៅក្នុងសម្ព័ន្ធសភាដ៏ធំទូលាយរបស់លោក Petro ដែលជំរុញឱ្យមានការរុះរើគណៈរដ្ឋមន្ត្រីកាលពីខែមេសា។

កិច្ចខិតខំប្រឹងប្រែងដើម្បីដាក់ចេញសេចក្ដីស្នើច្បាប់នេះបានកើតឡើង បន្ទាប់ពីសភាជាន់ទាបបាននិយាយថា ខ្លួននឹងផ្អាកការពិភាក្សាដេញដោលលើកំណែទម្រង់នេះ ស្របពេលមានការចោទប្រកាន់ពីភាពមិនប្រក្រតីផ្នែកហិរញ្ញវត្ថុនៃយុទ្ធនាការ ដែលលោក Petro បានបដិសេធយ៉ាងដាច់ខាត។

ការចោទប្រកាន់ទាំងនេះគឺផ្អែកលើសារសំឡេងដែលបានផ្ញើពីអតីតឯកអគ្គរដ្ឋទូតលោក Armando Benedetti ទៅកាន់អតីតប្រធានបុគ្គលិករបស់លោក Petro គឺលោកស្រី Laura Sarabia ដែលក្នុងនោះលោក Benedetti ប្រើឃ្លាដែលត្រូវបានបកស្រាយថាពាក់ព័ន្ធនឹងមូលនិធិយុទ្ធនាការខុសច្បាប់។ លោក Benedetti បាននិយាយថាសារសំឡេងទាំងនោះត្រូវបានគេរៀបចំឡើង។

លោក Benedetti និងលោកស្រី Sarabia ដែលបានលាលែងពីតំណែងជុំវិញរឿងអាស្រូវផ្សេងមួយទៀត ប៉ុន្តែជាប់ពាក់ព័ន្ធជាមួយគ្នា នឹងផ្តល់សក្ខីកម្មដល់អាជ្ញាធររៀបចំការបោះឆ្នោតនៅសប្តាហ៍ក្រោយ។ ក្នុងពេលថ្លែងសុន្ទរកថា លោក Petro ក៏បានបញ្ជាក់ជាថ្មីថា រដ្ឋាភិបាលរបស់លោកមិនបានរំលោភសិទ្ធិអ្នកណាមួយឡើយ។ រដ្ឋាភិបាលអាចបញ្ចូនកំណែទម្រង់នោះទៅសម័យប្រជុំនីតិបញ្ញត្តិបន្ទាប់ ដែលនឹងចាប់ផ្តើមនៅថ្ងៃទី ២០ ខែកក្កដា៕