ភ្នំពេញ៖ ក្រសួងផែនការ បានដាក់ឲ្យប្រើប្រាស់ប្រព័ន្ធ APP (Public IDPoor App) ដើម្បីទទួលនូវសំណូមពរ របស់ គ្រួសារក្រីក្រ និងគ្រួសារងាយរងហានិភ័យ ក្នុងការកំណត់អត្តសញ្ញារបស់ពួកគេ ហើយធ្វើការដោះស្រាយ ។

ក្នុងពិធីប្រកាសផ្សព្វផ្សាយ ដាក់ឲ្យប្រើប្រាស់ប្រព័ន្ធគ្រប់គ្រងមតិជំទាស់ និងសំណូមពរ នៃកម្មវិធីកំណត់ អត្តសញ្ញាណគ្រួសារក្រីក្រ និងគ្រួសារងាយរងហានិភ័យ នៅថ្ងៃទី៨ ខែមិថុនា ឆ្នាំ២០២៣ ឯកឧត្តម កែវ អ៊ូលី ប្រធាននាយកដ្ឋានអត្តសញ្ញាណកម្មគ្រួសារក្រីក្រ លើកឡើងថា ការបង្កើត APP នេះឡើង ដើម្បីធានានូវ គណនេយ្យភាព តម្លាភាព និងពង្រីកការអនុវត្តការងារកំណត់អត្តសញ្ញាណគ្រួសារក្រីក្រ និងគ្រួសារងាយរង ហានិភ័យ ឲ្យកាន់តែមានប្រសិទ្ធភាព ។

ឯកឧត្តមបន្តថា ប្រជាពលរដ្ឋ និងអ្នកពាក់ព័ន្ធ អាចប្រើ APP នេះ ស្នើសុំបណ្ណសមធម៌, ការផ្ដល់មតិជំទាស់ និង សំណូមពរ, ការទទួលព័ត៌មានស្តីពី អត្តសញ្ញាណកម្មគ្រួសារក្រីក្រ និងគ្រួសារងាយរងហានិភ័យ និងការផ្ទៀងផ្ទាត់ បណ្ណសមធម៌ ហើយរាល់មតិជំទាស់ និងសំណូមពរទាំងអស់នឹងដោះស្រាយទៅតាមប្រភេទមតិជំទាស់ និង សំណូមពរទាន់ពេលវេលា និងរក្សាការសម្ងាត់ ។

ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានមានប្រសាសន៍ថា កម្មវិធីថ្មីនេះ បាន ភ្ជាប់ជាមួយនូវប្រព័ន្ធមូលដ្ឋានទិន្នន័យ គ្រួសារក្រីក្រថ្នាក់ជាតិ ដែលអាចឱ្យក្រសួងផែនការ និងមន្ទីរផែនការ រាជធានី/ខេត្ត ដឹងអំពីមតិជំទាស់ និងសំណូមពរគ្រប់ប្រភេទដែលប្រជាពលរដ្ឋ និងអ្នកពាក់ព័ន្ធផ្សេងៗបានដាក់ស្នើសុំ និងលំហូរ នៃការដោះស្រាយផងដែរ ។

ឯកឧត្តមបានបន្តថា ប្រព័ន្ធតាមដានត្រួតពិនិត្យ និងប្រព័ន្ធគ្រប់គ្រងមតិជំទាស់ និងសំណូមពរ ត្រូវបណ្តុះបណ្តាលបន្ត ដល់ក្រុមការងារអត្តសញ្ញាណកម្មគ្រួសារក្រីក្រឃុំ-សង្កាត់ដែរ ដើម្បីឱ្យពួកគេយល់ពីដំណើរការគ្រប់គ្រង និង ដោះស្រាយរាល់មតិជំទាស់ និងសំណូមពរ ដោយកន្លងមក មានការផ្លាស់ប្តូរមន្រ្តីក្រុមការងារឃុំ-សង្កាត់ ហើយក្រុមការងារឃុំ-សង្កាត់មួយចំនួនអនុវត្តមិនទាន់បានសមស្របតាមនីតិវិធី ទើបក្រសួង ទាមទារឲ្យមាន ការបណ្តុះបណ្តាលបំប៉នឡើងវិញពីនីតិវិធី និងធ្វើបច្ចុប្បន្នភាពកម្មវីធីដល់ក្រុមការងារឃុំ-សង្កាត់ ជាប្រចាំ ៕ ដោយ ៖ បាន សុខរិទ្ធិ