ភ្នំពេញ ៖  នាព្រឹកថ្ងៃទី៨ ខែមិថុនា ឆ្នាំ២០២៣នេះ ឯកឧត្តមសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល អមដំណើរដោយលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការប្រចាំការក្រសួងសុខាភិបាល និងជាប្រធាន​ក្រុមប្រឹក្សាភិបាលមន្ទីរពេទ្យជាតិ តេជោសន្ដិភាព និងឯកឧត្តម ឃួង ស្រេង អភិបាលរាជធានីភ្នំពេញ បានអញ្ជើញចុះ​ពិនិត្យវឌ្ឍនភាព នៃដំណើរការសាងសង់មន្ទីរពេទ្យជាតិ តេជោសន្ដិភាព បានសាងសង់រួចជាស្ថានពរ គ្រោងនឹង​សម្ពោធដាក់ឱ្យប្រើប្រាស់ជាផ្លូវការនាពេលខាងមុខនេះ។

​នាឱកាសចុះពិនិត្យជាថ្មីម្ដងទៀតនេះ ដើម្បីជំរុញ និងសម្រួលនូវការងារណាដែលនៅសេសសល់តិចតួច រៀបចំឱ្យ​បាន​សម្រិតសម្រាំងស្អាតល្អ ក្នុងការត្រៀមជាស្រេច ដើម្បីសម្ពោធដាក់ឱ្យ​ប្រើប្រាស់ជាផ្លូវការនា​ពេលឆាប់ៗ​ខាងមុខនេះ ក្រោមអធិបតីភាពដ៏ខ្ពង់ខ្ពស់បំផុតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណចក្រកម្ពុជា។

លោកជំទាវវេជ្ជបណ្ឌិត យក់ សម្បត្ដិ បានលើកឡើងនាពេលកន្លងមកថា មន្ទីរពេទ្យជាតិ តេជោសន្ដិភាពនេះ បាន​សាងសង់ឡើងក្រោមគំនិតផ្តួចផ្តើមរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែល​មានចំណុះប្រមាណជា១ម៉ឺនគ្រែ ដើម្បីត្រៀមលក្ខណៈជាស្រេច​ក្នុងការទ្រទ្រង់សភាព​ការណ៍នៃការរាត​ត្បាតជំងឺ​សកលណាមួយ ដែលមានទីតាំង និងកន្លែងសម្រាប់បម្រើសេវាពិនិត្យព្យាបាលជូនប្រជាពលរដ្ឋបានទាន់ពេលវេលា ដោយមិនឱ្យមានការព្រួយបារម្ដឡើយ។ ជាមួយគ្នានោះ លោកជំទាវវេជ្ជបណ្ឌិត យក់ សម្បត្ដិ ក៏បានជំរុញលើក​ទឹកចិត្ដ និងណែនាំដល់ក្រុមការងារគ្រូពេទ្យថា មន្ទីរពេទ្យ ធំ ស្អាត តែសំខាន់បំផុតនោះ គឺគ្រូពេទ្យ ត្រូវតែមានក្រម​សីលធម៌ វិជ្ជាជីវៈ ទៀត ទើបប្រជាជនមានទំនុកចិត្ត ការងារនេះត្រូវធ្វើការរួមគ្នាទើបបានជោគជ័យ។

សូមបញ្ជាក់ផងដែរថា មន្ទីរពេទ្យជាតិ តេជោសន្ដិភាព មានទីតាំងស្ថិតលើមហាវិថីឈ្នះ-ឈ្នះ ស្ថិតនៅភូមិកប់ស្រូវធំ សង្កាត់គោករកា ខណ្ឌព្រែកព្នៅ រាជធានីភ្នំពេញ មកដល់ពេលនេះបានបង្អួតរាងយ៉ាងល្អប្រណិតហើយ ដែលនេះជា​សមិទ្ធផលដ៏ធំមួយទៀតរបស់សម្ដេចអគ្គមហាសេនាបតីតេជោ ហ៊ុន សែន ដើម្បីសុខុមាលភាពប្រជាពលរដ្ឋកម្ពុជា ដែលមានរហូតជិត១ម៉ឺនគ្រែ។ មន្ទីរពេទ្យជាតិដ៏ធំមួយនេះ ត្រូវបានរដ្ឋបាលរាជធានីភ្នំពេញ ប្រារព្ធពិធីក្រុងពាលីតាម​បែបសាសនា សុំម្ចាស់ទឹក ម្ចាស់ដី ដើម្បីសាងសង់ កាលពីរសៀលថ្ងៃទី១៤ ខែកុម្ភៈ ឆ្នាំ២០២២ ហើយមន្ទីរពេទ្យ​ជាតិនេះ មានអគារសម្រាកព្យាបាល និងសង្គ្រោះបន្ទាន់ (E) អគារសម្រាកព្យាបាលកម្រិតធ្ងន់ (H1 និង H2) អគារសម្រាកព្យាបាលកម្រិតស្រាល (H3, H4, H5, H6 និង H7)។ សរុបចំនួនគ្រែអ្នកជំងឺពីអគារ ( H1 ដល់ H7) ទាំងអស់ មានប្រមាណ១ម៉ឺនគ្រែ ជាមួយ និងអគារបច្ចេកទេស (T)។ មណ្ឌលនេះ មានចំណតរថយន្ត (P) សួនច្បារ (G3) មានសួនបៃតង អគារផ្គត់ផ្គង់ និងព័ត៌មាន (A) អគារស្នាក់នៅសម្រាប់បុគ្គលិក (S)។ សម្រាប់អគារ A, S, E, H1, H2, H3, H4, H5, H6, H7, T1, T2 ដែលអគារនីមួយៗ សុទ្ធតែមានមុខងារសំខាន់ៗ ជាពិសេសអគារ T1, T2 ៕ ដោយ ៖ រដ្ឋា