រលកកម្តៅក្តៅខ្លាំងដ៏ធ្ងន់ធ្ងរបំផុត កំពុងធ្វើឲ្យប្រជាពលរដ្ឋស្ទើថប់ដង្ហើមស្លាប់នៅក្នុងដែនដីពើតូរីកូរបស់សហរដ្ឋអាមេរិក ពេលដែលសីតុណ្ហភាព បានកើនឡើងរហូតដល់ទៅ ៥២អង្សាសេ ហើយលោក Jeff Berardelli គឺជាអ្នកឧតុនិយមដែលមានមូលដ្ឋាននៅរដ្ឋ Florida សហរដ្ឋអាមេរិក បានចាត់ទុកស្ថានភាពនៅក្នុងប្រទេសកោះមួយនេះថា គំរាមកំហែងដល់អាយុជីវិត។ 

លោក Jorge Morales Wiscovitch គឺជាអភិបាលក្រុង Cabo Rojoនិយាយថា ព្រះអាទិត្យពិតជាឃោរឃៅខ្លាំងណាស់ ហើយកម្តៅ ធ្វើឲ្យពួកយើងពុំអាចទ្រាំបាននោះទេ។ ក្រុមអ្នកស្រុក ត្រូវបានគេមើលឃើញទិញកង្ហា និងហែលទឹកក្នុងអាង ដើម្បីទប់ទល់នឹងរលកកម្តៅដ៏អាក្រក់នេះ។ 

ក្រុមអ្នកវិទ្យាសាស្រ្តនិយាយថា បញ្ហាបម្រែបម្រួលអាកាសធាតុ បានរួមចំណែកយ៉ាងសំខាន់ធ្វើឲ្យកើតមានរលកកម្តៅញឹកញាប់ ធ្ងន់ធ្ងរ និងយូរជាងមុន នៅទូទាំងពិភពលោក៕