ឧទ្ធម្ភាគចក្រដែលជាជំនួយរបស់អង្គការសហប្រជាជាតិ បានចុះចតនៅអាកាសយានដ្ឋានអន្តរជាតិ Hodeida ក្នុងប្រទេសយ៉េម៉ែន កាលពីថ្ងៃពុធ ដោយបញ្ចប់ការសាកល្បង និងប្រតិ​បត្តិ​កា​រ​​សាកល្បងដោយជោគជ័យបន្ទាប់ពីការផ្អាករយៈពេលប្រាំបីឆ្នាំ ចាប់តាំងពីការវាយប្រហារតាមអាកាសដោយក្រុមចម្រុះដឹកនាំដោយអារ៉ាប៊ីសាអូឌីតមក។

ឧទ្ធម្ភាគចក្រដែលហោះចេញពីប្រទេស Djibouti (ជីប៊ូទី) បានចុះចតនៅអាកាសយានដ្ឋាន Hodeida ហើយត្រឡប់ទៅប្រទេស Djibouti វិញ បន្ទាប់ពី​បានសាកល្បង​ការហោះហើរ​ឧទ្ធម្ភាគ​ចក្រ​សង្គ្រោះបន្ទាន់ និងការចុះចតនៅអាកាសយានដ្ឋាននោះ។

អាកាសយានដ្ឋានត្រូវបានបំផ្លាញនៅក្នុងការវាយឆ្មក់តាមអាកាសកាលឆ្នាំ ២០១៥ នៅពេលដែលក្រុមចម្រុះដឹកនាំដោយអារ៉ាប៊ីសាអូឌីត បានចូលទៅក្នុងប្រទេសយ៉េម៉ែន ដើម្បីគាំទ្រ​រដ្ឋាភិបាល​យ៉េម៉ែន បន្ទាប់ពីកងជីវពល Houthi គាំទ្រដោយអ៊ីរ៉ង់បានដណ្តើមកាន់កាប់ទីក្រុងភាគខាងជើងជាច្រើន និងបានបង្ខំរដ្ឋាភិបាល​យ៉េម៉ែនដែលគាំទ្រ ដោយអារ៉ាប៊ីសាអូឌីត ចេញ​ពី​រដ្ឋធានីសាណាកាលឆ្នាំ២០១៤។

ដោយសារតែការខូចខាតយ៉ាងធ្ងន់ធ្ងរ និងដំណើរការខុសប្រក្រតីនៅក្នុងអាកាសយានដ្ឋាន បច្ចុប្បន្ននេះវាបំពេញបានតែលក្ខខណ្ឌបច្ចេកទេសសម្រាប់ការហោះឡើង និងចុះចត​ឧទ្ធម្ភាគចក្រ​សង្គ្រោះបន្ទាន់ប៉ុណ្ណោះ។

អាកាសយានដ្ឋាននេះ ត្រូវបានគេរំពឹងថានឹងចំណាយពេលយ៉ាងតិចប្រាំមួយខែ ឬរហូតដល់មួយឆ្នាំដើម្បីស្តារឡើងវិញតាមរយៈការជួសជុល និងបង្កើតឡើងវិញ មុនពេលវាអាច​ដំណើរ​ការការហោះ​ហើរ និងចុះចតយន្តហោះធម្មតាបាន៕