ភ្នំពេញ ៖ ឯកឧត្តម សាស្រ្តាចារ្យ ធា គ្រុយ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានជំរុញលើកទឹកចិត្តដល់សាស្ត្រាចារ្យ និស្សិតសាកលវិទ្យាល័យ​វិទ្យាសាស្ត្រ​សុខាភិបាល​ខិតខំធ្វើការស្រាវជ្រាវជាប្រចាំដើម្បីសម្រួចចំណេះដឹង ទ្រឹស្តី និងការអនុវត្តឱ្យកាន់​តែប្រសើរឡើង​ថែមទៀត។

​ការថ្លែងរបស់ឯកឧត្តម សាស្រ្តាចារ្យ ធា គ្រុយ យ៉ាងដូច្នេះ ក្នុងសិក្ខាសាលាអន្តរជាតិ រៀបចំឡើងដោយ​សាកលវិទ្យាល័យវិទ្យាសាស្ត្រសុខាភិបាល និងបណ្ឌិតសភាជាតិវេជ្ជសាស្ត្រ នៃប្រទេសបារាំង នៅព្រឹកថ្ងៃទី០៨ ខេមិថុនា ឆ្នាំ២០២៣នេះ។

ឯកឧត្តមសាស្ត្រាចារ្យ ធា គ្រុយ បានលើកឡើងទៀតថា នៅពេលសាស្ត្រាចារ្យ និងនិស្សិតសាកលវិទ្យាល័យ​វិទ្យាសាស្ត្រសុខាភិបាល ទទួលបានចំណេះដឹងខ្ពស់ នឹងចូលរួមចែករំលែកចំណេះ​ដឹងទាំងនេះទៅ​ជូនសហភាតរៈរបស់យើងនៅគ្រប់រាជធានី-ខេត្ត ដើម្បីឱ្យពួកគាត់មានចំណេះដឹងជ្រៅជ្រះចូលរួមពិនិត្យ ពិគ្រោះ ព្យាបាលជំងឺប្រកបដោយគុណភាព និងប្រសិទ្ធភាពខ្ពស់ សំដៅលើកម្ពស់សេវាសុខាភិបាលកាន់តែប្រសើរឡើង។ ជាក់ស្តែងសិក្ខាសាលានាពេលនេះពិតជាបានរួមចំណែកយ៉ាងសំខាន់ ក្នុងការអភិវឌ្ឍសមត្ថភាពបន្ត របស់អ្នកប្រកបវិជ្ជាជីវៈក្នុងវិស័យសុខាភិបាល ក៏ដូចជាការពង្រីកចំណេះដឹងបន្ថែម ជូនដល់ក្មួយៗជានិស្សិត នៅសាកលវិទ្យាល័យវិទ្យាសាស្ត្រសុខាភិបាលផងដែរ។

ជាមួយគ្នានោះដែរឯកឧត្តមសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃ​សាកលវិទ្យាល័យវិទ្យាសាស្ត្រសុខាភិបាល បានមានប្រសាសន៍ថា សិក្ខាសាលាអន្តរជាតិនេះ ធ្វើឡើងក្នុងគោល​បំណងដើម្បីចែករំលែកចំណេះដឹងជូនអ្នកប្រកបវិជ្ជាជីវៈសុខាភិបាល និងនិស្សិត អំពីបច្ចុប្បន្នភាពថ្មីៗ​ទាក់ទិននឹងប្រធានបទទាំង៣ ដែលបានជ្រើសរើស លើកកម្ពស់ស្រាវជ្រាវ និងជំរុញលើកទឹកចិត្តការងារ​ស្រាវជ្រាវក្នុងចំណោមអ្នកប្រកបវិជ្ជាជីវៈសុខាភិបាលកម្ពុជា សាស្ត្រាចារ្យ និងនិស្សិតសាកលវិទ្យាល័យ និងផ្តល់ឱកាស និងជំរុញទំនាក់ទំនងបណ្តាញក្នុងចំណោមអ្នកវិជ្ជាជីវៈសុខាភិបាល អ្នកស្រាវជ្រាវកម្ពុជា និងបារាំង ព្រមទាំងពង្រឹងកិច្ចសហប្រតិបត្តិការដែលមានជាយូរអង្វែងរវាងសាកលវិទ្យាល័យវិទ្យាសាស្ត្រសុខាភិបាល និងបណ្ឌិតសភាជាតិវេជ្ជសាស្ត្រ នៃប្រទេសបារាំង។

ឯកឧត្តមសាស្ត្រាចារ្យ សាផុន វឌ្ឍនៈ បានបញ្ជាក់ថា សិក្ខាសាលានេះ នឹងមានបទបង្ហាញចំនួន៩ សម្រាប់​សាស្ត្រាចារ្យ ​និស្សិត និងសាធារណជន ដែលបានចុះឈ្មោះចូលរួម ហើយនឹងមានការបែងចែកជាក្រុមគ្រូពេទ្យ អ្នក​ស្រាវជ្រាវបារាំង-កម្ពុជា ជាក្រុមពិភាក្សាចំនួន៣ក្រុម ដើម្បីប្រមូលធាតុចូល និងអនុសាសន៍ផ្សេងៗ សម្រាប់ការ​រៀបចំជាសំណើរគម្រោងស្រាវជ្រាវទៅពេលអនាគត។ បច្ចុប្បន្ន សាកលវិទ្យាល័យបាននឹង​កំពុងផ្តល់អាទិភាព​ខ្ពស់លើការងារស្រាវជ្រាវ និងខិតខំលើកទឹកចិត្តសាស្ត្រាចារ្យ មន្ត្រី បុគ្គលិក និងនិស្សិត ឱ្យធ្វើការស្រាវជ្រាវជាប្រចាំ ដែលនេះក៏ជាផ្នែកមួយក្នុងការពង្រឹងគុណភាព បណ្តុះបណ្តាល ជំរុញការបង្រៀន និងការរៀនផ្តោតលើភស្តុតាង និងមានបច្ចុប្បន្នភាពពិសេសអាចឱ្យពួកគាត់អាចចែករំលែកបទពិសោធន៍គ្នាទៅវិញទៅមក ទាំងបទពិសោធន៍​ចំណេះដឹង និងព័ត៌មានវិទ្យាសាស្ត្រនានា ដែលកើតចេញពីការងារស្រាវជ្រាវរបស់ពួកគាត់ ក៏ដូចជាការបង្កើត​បណ្តាញ​អន្តរជាតិសម្រាប់ការងារស្រាវជ្រាវទៅថ្ងៃអនាគត៕ ដោយ ៖ រដ្ឋា