ត្រី​ងាប់​រាប់ម៉ឺន​ក្បាល បាន​អណ្តែត​មក​ទើរ​លើ​មាត់​អាង​ស្តុក​ទឹក Kakhovka​ក្រោយ​ការបំផ្លាញ​ទំនប់​ក្នុង​យុគសម័យ​សហភាពសូវៀត​កាលពី​ថ្ងៃ​អង្គារ នៅ​តំបន់​ភាគខាងត្បូង​ប្រទេស​អ៊ុយ​ក្រែ​ន ដែល​គ្រប់គ្រង​ដោយ​រុស្ស៊ី ។

អាង​ស្តុក​ទឹក Kakhovka ស្ថិតនៅលើ​ផ្ទៃដី​ទំហំ ២.១៥៥​គ​.​ម​ក្រឡា មាន​ស្តុក​ទឹក ១៨​គ​.​ម​គូប គឺជា​ទំហំ​មួយ​ស្មើនឹង​បឹង Great Salt Lake ស្ថិតក្នុង​រដ្ឋ Utah សហរដ្ឋអាមេរិក ។

ការបំផ្លាញ​ទំនប់ បាន​បញ្ចេញ​ទឹកជំនន់​នៅ​ទូទាំង​តំបន់​សង្គ្រាម គឺជា​អ្វីមួយ​ដែល​ភាគី​អ៊ុយ​ក្រែ​ន និង​រុស្ស៊ី និយាយថា គឺជា​ការវាយប្រហារ​ដោយ​ចេតនា​ដោយ​កងកម្លាំង​ម្ខាង​ទៀត ។

លោកតា Viktor Nedria រស់នៅ​ក្នុងភូមិ Marianske​គឺជា​ភូមិ​មួយ​ស្ថិតនៅលើ​មាត់​អាង​ស្តុក​ទឹក Kakhovka និយាយថា អ្វីដែល​ពួកយើង​មើលឃើញ​គឺជា​រូបភាព​នៃ​គ្រោះមហន្តរាយ​អេកូឡូស៊ី ។ នីវ៉ូ​ទឹកបាន​ធ្លាក់ចុះ​យ៉ាង​ឆាប់រហ័ស យ៉ាង​លឿន ដែល​សូម្បីតែ​ត្រី​នៅក្នុង​អាង​ស្តុក​ទឹក​នេះ ក៏​មិនអាច​ហែល​ទាន់​ដែរ​ទៅកាន់​ទឹក​ជ្រៅ ។

លោកតា​បន្តថា ទំហំ​នៃ​គ្រោះមហន្តរាយ​ដ៏​អាក្រក់​នេះ នៅ​ពុំ​អាច​ប៉ាន់ស្មាន​បាន​នៅឡើយ​ទេ ប៉ុន្តែ​វា​មាន​ទំហំធំធេង​ខ្លាំងណាស់ ។

ខណៈពេល​នោះដែរ ក្រុម​អ្នកភូមិ បាន​ប្រញាប់ប្រញាល់​ធ្វើ​ទំនប់​បណ្តោះអាសន្ន ដើម្បី​សង្គ្រោះ​ត្រី​ទាំងនេះ និង​រក្សា​ទឹក​ឲ្យ​បាន​ច្រើន​តាម​ដែល​អាចធ្វើ​ទៅបាន​សម្រាប់​ប្រើប្រាស់​ក្នុង​សហគមន៍ ៕​