ជើងចុងក្រោយនៃដំណើរទេសចរណ៍របស់ពានរង្វាន់ FIFA World Cup ផ្នែកនារី (FIFA Women's World Cup Trophy Tour) បានចាប់ផ្ដើមចេញដំណើរ នៅឯសួនសត្វ Taronga ក្នុងទីក្រុងស៊ីដនី (Sydney) ប្រទេសអូស្រ្តាលី នៅថ្ងៃព្រហស្បតិ៍ (ទី៨ ខែមិថុនា) នេះ។

ពានរង្វាន់ World Cup នេះ បានធ្វើដំណើរទៅកាន់គ្រប់សមាគមសមាជិកចូលរួមទាំងអស់ចំនួន ៣២ក្រុម នៅមុនកម្មវិធីប្រកួតដែលតែងកើតឡើង ៤ឆ្នាំម្ដងនាពេលខាងមុខ ដោយព្រឹត្តិការណ៍នេះ នឹងមានការធ្វើម្ចាស់ផ្ទះរួមគ្នាពីសំណាក់ប្រទេសអូស្ត្រាលី និងនូវ៉ែលហ្សេឡង់ ហើយនឹងដំណើរការពីថ្ងៃទី២០ ខែកក្កដា ដល់ថ្ងៃទី២០ ខែសីហា។

កីឡាការិនី Briana Scurry ដែលជាអតីតអ្នកចាំទីក្រុមបាល់ទាត់ជម្រើសជាតិនារីរបស់សហរដ្ឋអាមេរិក និងជាម្ចាស់ជយលាភីពានរង្វាន់ World Cup រួមជាមួយនឹងប្រមុខរដ្ឋាភិបាលនៃរដ្ឋ New South Wales លោក Chris Minns បានបង្ហាញពានរង្វាន់នេះ ដែលអាចមើលឃើញនៅលើ Sydney Harbour។

ពានរង្វាន់នេះ ដែលត្រូវបានរចនាឡើងក្នុងឆ្នាំ១៩៩៨ ធ្វើពីសំរឹទ្ធស្រោបមាស និងត្រូវបានខាត់ដោយអាលុយមីញ៉ូម។ ពាននានេះមានទម្ងន់ ៤,៦គីឡូក្រាម និងមានកម្ពស់ ៤៧សង់ទីម៉ែត្រ។ មានតែអតីតម្ចាស់ជើងឯក World Cup និងប្រមុខរដ្ឋប៉ុណ្ណោះ ដែលត្រូវបានអនុញ្ញាតឲ្យប៉ះ និងកាន់ពានរង្វាន់នេះ៕