នៅថ្ងៃព្រហស្បតិ៍ (៨ មិថុនា)នេះ រដ្ឋមន្ត្រីការបរទេសអាមេរិក លោក Antony Blinken បានជួបប្រជុំគ្នាជាមួយបណ្ដាសមាជិកនៃសម្ព័ន្ធសកលប្រឆាំងនឹងក្រុមរដ្ឋឥស្លាម ក្នុងអំឡុង​ដំណើរ​​ទស្សន​​កិច្ចរបស់លោកទៅកាន់ទីក្រុងរីយ៉ាដរបស់អារ៉ាប៊ីសាអូឌីត។ ក្នុងអំឡុងសម័យប្រជុំ លោក Blinken បានសង្កត់ធ្ងន់លើសារៈសំខាន់ នៃការធ្វើមាតុភូមិនិវត្តន៍​ក្នុងការកាត់​បន្ថយ​ហានិភ័យ នៃការងើបឡើងវិញនៃក្រុមរដ្ឋឥស្លាម ។

ប្រមុខការទូតរបស់សហរដ្ឋអាមេរិករូបនេះ​ បានទៅដល់អារ៉ាប៊ីសាអូឌីតកាលពីល្ងាចថ្ងៃអង្គារ (៦ មិថុនា) សម្រាប់ដំណើរទស្សនកិច្ចដែលរំពឹងទុកខ្ពស់ពីផ្លែផ្កា ស្របពេលទំនាក់ទំនង​មាន​ការ​រអាក់រអួលដោយសារតែការខ្វែងគំនិតគ្នាដ៏ជ្រាលជ្រៅលើបញ្ហាគ្រប់យ៉ាងចាប់ពីគោលនយោបាយអ៊ីរ៉ង់ រហូតដល់បញ្ហាសន្តិសុខក្នុងតំបន់ តម្លៃប្រេង និងសិទ្ធិមនុស្ស។

ទីក្រុងវ៉ាស៊ីនតោនបានតស៊ូដើម្បីរក្សាទំនាក់ទំនងស្ថិរភាពជាមួយទីក្រុងរីយ៉ាដ ជាទីដែលព្រះអង្គម្ចាស់ Mohammed មេដឹកនាំតាមជាក់ស្តែង មានឥទ្ធិពលខ្លាំងក្នុងការសម្រេចចិន្ត ហើយ​ខណៈ​ដែលសម្ព័ន្ធភាពសន្តិសុខជាប្រពៃណីសម្រាប់ផលប្រយោជន៍បានប្រេះស្រាំក្រោមការងើបឡើងរបស់សហរដ្ឋអាមេរិកក្នុងនាមជាប្រទេសផលិតប្រេងដ៏ធំ។

ដំណើរ​ទស្សនកិច្ចរបស់លោក Blinken បានធ្វើឡើងប៉ុន្មានថ្ងៃបន្ទាប់ពីប្រទេសនាំចេញប្រេងឆៅឈានមុខគឺអារ៉ាប៊ីសាអូឌីត បានសន្យាថានឹងកាត់បន្ថយ​ទិន្នផលប្រេងកាន់​តែច្រើននៅលើកិច្ចព្រមព្រៀងរបស់ក្រុម OPEC+ ដ៏ទូលំទូលាយមួយដើម្បីកំណត់ការផ្គត់ផ្គង់ ខណៈដែលកិច្ចព្រមព្រៀងនេះព្យាយាមបង្កើនតម្លៃប្រេងដែលកំពុងធ្លាក់ចុះ បើទោះបីជាមានការប្រឆាំងពីរដ្ឋបាលសហរដ្ឋអាមេរិកក៏ដោយ៕