ក្រសួងការបរទេសចិនបាននិយាយនៅក្នុងសន្និសីទសារព័ត៌មានប្រចាំមួយនៅថ្ងៃព្រហស្បតិ៍ (៨ មិថុនា)នេះថា សមយុទ្ធល្បាតរួមគ្នារបស់ចិន​ជាមួយរុស្ស៊ីមិន​បានកំណត់​គោលដៅ​លើប្រទេស​ជាក់លាក់ណាមួយឡើយ ហើយបានអនុលោមតាមច្បាប់ និងបទដ្ឋានអន្តរជាតិ។

ប្រទេសចិនបានបញ្ចប់ដំណាក់កាលទីពីរនៃសមយុទ្ធល្បាតតាមអាកាសរួមគ្នាជាមួយរុស្ស៊ីនៅលើមហាសមុទ្រប៉ាស៊ីហ្វិកខាងលិចកាលពីថ្ងៃពុធ (៧ មិថុនា) បន្ទាប់ពីសមយុទ្ធហោះ​ហើ​រ​កាលពី​ថ្ងៃមុននៅ​លើសមុទ្រជប៉ុន និងសមុទ្រចិនខាងកើត ដែលបង្កឱ្យមានការព្រួយបារម្ភនៅក្នុងប្រទេសជប៉ុនអំពីសន្តិសុខជាតិរបស់ខ្លួន។ ទាំងកូរ៉េខាងត្បូងទាំងជប៉ុន បាន​ផ្អាក​សកម្មភាពយន្តហោះចម្បាំងកាលពីថ្ងៃអង្គារ (៦ មិថុនា) នៅពេលដែលសមយុទ្ធល្បាតរួមគ្នារបស់ចិន និងរុស្ស៊ីបានចាប់ផ្តើម ជាផ្នែកនៃផែនការ​សហប្រតិបត្តិការប្រចាំឆ្នាំរបស់យោធារបស់ពួកគេ។

អ្នកនាំពាក្យក្រសួងការបរទេសចិន លោក Wang Wenbin បាននិយាយនៅក្នុងទីក្រុងប៉េកាំងថា "ការល្បាតយុទ្ធសាស្ត្រតាមអាកាសរួមរវាងរុស្ស៊ី-ចិននេះ គឺស្របតាមច្បាប់អន្តរជាតិ និងការអនុវត្ត ហើយមិនត្រូវបានធ្វើឡើងប្រឆាំងនឹងប្រទេសណាមួយឡើយ"។

ភាពជាដៃគូ "គ្មានដែនកំណត់" កាន់តែស៊ីជម្រៅរវាងមហាអំណាចចិនដែលកំពុងកើនឥទ្ធិពលខ្លាំង និងរុស្ស៊ីដែលសម្បូរបែបដោយធនធានធម្មជាតិ កំពុងត្រូវបានមើលដោយលោក​ខាងលិចជា​មួយ​នឹងការបារម្ភមួយចំនួន ទោះបីជាវាមិនច្បាស់ថាភាពជាដៃគូនេះមានភាពស៊ីជម្រៅកម្រិតណាក៏ដោយ៕