ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី បានបញ្ជាក់ជាថ្មីថា រាជរដ្ឋាភិបាលនឹងមិនដំឡើង​ថ្លៃភ្លើង​អគ្គិសនីនោះទេ បើទោះបីជាប្រទេសជិតខាងកំពុងខ្វះខាតភ្លើងប្រើប្រាស់ ហើយពិភពលោកកំពុងជួបវិបត្តិការកើនតម្លៃប្រេង និងឧស្ម័ន ។

ក្នុងពិធីជួបសំណេះសំណាលជាមួយកម្មករ កម្មការិនី ជិត២ម៉ឺននាក់ នៅខេត្តកំពង់ឆ្នាំង នាថ្ងៃទី៩ ខែមិថុនា ឆ្នាំ២០២៣ សម្ដេចតេជោ នាយករដ្ឋមន្ត្រី មានប្រសាសន៍ថា ប្រទេសនានាមានការ​ដំឡើង​ថ្លៃភ្លើង តែសម្រាប់កម្ពុជាសម្ដេច បានសំណូមពរដល់ក្រុមហ៊ុនអគ្គិសនី កុំដំឡើងថ្លៃភ្លើង បើតម្លៃថ្លៃ នឹងប៉ះពាល់រង្គើរពេញប្រទេស ។

សម្ដេចតេជោ បានបន្ថែមថា ប៉ុន្មានថ្ងៃកន្លងទៅនេះ នៅប្រទេសវៀតណាម បានខ្វះភ្លើងខ្លាំងណាស់ ដោយសារតែរលកកម្ដៅ ការផលិតមិនគ្រប់គ្រាន់ ​ហើយតម្រូវការកាន់តែច្រើន ជាក់ស្ដែងករណី​នៅ​ក្រុងហាណូយ តាមផ្ទះខ្វះភ្លើងប្រើប្រាស់​ ពលរដ្ឋរត់ទៅទិញទំនិញក្នុងផ្សារទំនើប ហើយឆ្លៀតជ្រកគេចពីរលកកម្ដៅនេះ ។

សម្ដេចតេជោ ហ៊ុន សែន បានសង្កត់ធ្ងន់ថា តែយ៉ាងណា ពាក់ព័ន្ធបញ្ហាអគ្គិសនីនេះ ទោះជួបការ​លំបាក ក៏កម្ពុជាមិនដំឡើង​ថ្លៃភ្លើងដែរ ហើយខិតខំស្វែងរក​ដំណោះបន្ថែមទៀត ។

គួរបញ្ជាក់ថា បច្ចុប្បន្ននេះ កម្ពុជាមានប្រភពផលិតថាមពលអគ្គិសនីជាច្រើនកន្លែង ត្រូវបាន​សាងសង់រួចរាល់ នៅតាមបណ្ដាខេត្តមួយចំនួន ​មានដូចជា រោងចក្រដើរដោយថាមពលធ្យូងថ្ម រោងចក្រផលិតអគ្គិសនី ​ដោយប្រព័ន្ធព្រះអាទិត្យ (សូឡា) ​និងទំនប់វារីអគ្គិសនីជាច្រើនកន្លែងទៀត ខណៈមានទំនប់​វារីអគ្គិសនីចំនួន ២ទៀត​ កំពុងសាងសង់ ក្នុងនោះមាននៅខេត្តកោះកុង និងខេត្តពោធិ៍សាត់ ៕ អត្ថបទ បាន សុខរិទ្ធិ