ប៉ាឡេស្ទីន ៖ ដោយសង្ឃឹមថានឹងបង្កើតសហគមន៍មេត្រីភាពអេកូឡូស៊ី និងបរិស្ថាន លោក Abdullah al-Safadi គឺជាម្ចាស់ហាងកាហ្វេប៉ាឡេស្ទីនមួយកន្លែង នៅក្នុងតំបន់កាន់កាប់ហ្គាហ្សាស្រ្ទីប ប្រើប្រាស់កាកកាហ្វេ ធ្វើជា​ជីកសិកម្មសម្រាប់រុក្ខជាតិដែលគាត់ដាំដុះ និងចែករំលែកបទពិសោធន៍មួយនេះជាមួយប្រជាកសិករនៅក្នុងតំបន់ ។ 

លោក Al-Safadi និយាយថា នៅហាងកាហ្វេរបស់លោក ពួកយើងប្រមូលកាកកាហ្វដែលប្រើរួច និងសម្ងួតវាឲ្យស្ងួត មុនពេលប្រើប្រាស់ធ្វើជាជីកសិកម្ម ។ លោកថា ការធ្វើបែបនេះ លោកមានបំណងការពារបរិស្ថាន និងបន្ថែមជី​ជាតិដីដែលប្រើប្រាស់សម្រាប់កសិកម្ម ។ 

ដោយលើកឡើងពីកង្វះខាតជីសរីរាង្គ និងជីឧស្សាហកម្ម លោក Safadi និយាយថា ពួកយើងចង់ឲ្យមានសហគមន៍​មេត្រីភាពអេកូឡូស៊ី និងបរិស្ថាន ។ ពួកយើងមានបំណងចង់ប្រើប្រាស់ឡើងវិញនូវកាកកាហ្វេ និងចែករំលែកគំនិត​នេះនៅក្នុងចំណោមហាងកាហ្វេធំៗបំផុត ដើម្បីទទួលបានបរិស្ថានមានសុខភាព និងសុវត្ថិភាព ។ 

លោក Rashid Matar គឺជាវិស្វករកសិកម្មដែលលក់រុក្ខជាតិដល់កសិករ និយាយថា កាកកាហ្វេលាយជាមួយដី ធ្វើឲ្យដីមានជីជាតិ ។ 

សូមបញ្ជាក់ថា កាហ្វេស្ថិតនៅក្នុងចំណោមភេសជ្ជៈពេញនិយមចូលចិត្តរបស់ជនប៉ាឡេស្ទីន ជាពិសេសនៅអំឡុងពេល​អាហារពេលព្រឹក ៕