​រដ្ឋាភិបាល​ប៉ា​គី​ស្ថាន នឹង​បង្ហាញ​ថវិកា​ប្រចាំឆ្នាំ​របស់ខ្លួន​ទៅកាន់​សភា នៅ​ថ្ងៃ​សុក្រ​នេះ ដែល​ធ្វើឡើង​ដើម្បី​បំពេញ​បំណង​របស់​មូលនិធិ​រូបិយវត្ថុ​អន្តរជាតិ ឬ IMF ដើម្បី​ទទួលបាន​ឱកាស​ណាមួយ ក្នុងការ​ធានាបាន​នូវ​ការចេញ​ថវិកា​សង្គ្រោះ​បន្ថែមទៀត ដោយ​ប្រទេស​ដែល​ត្រូវ​រួបរឹត​ដោយ​វិបត្តិ​មួយ​នេះ គ្រោង​នឹង​រៀបចំ​ការបោះឆ្នោត នៅ​ខែវិច្ឆិកា​។​

​ហានិភ័យ​នៃ​ការខកខាន​សងបំណុល​ជាតិ កំពុងមាន​កាន់តែ​ខ្ពស់ ដោយ​សេដ្ឋកិច្ច​ធ្លាក់ចុះ​ក្រោម​ឱនភាព​ទ្វេដង និង​អតិផរណា​ខ្ពស់បំផុត ដែល​បានធ្វើ​ឲ្យ​ប៉ះពាល់​បន្ថែមទៀត​ដល់​ប្រជាប្រិយភាព​នៃ​រដ្ឋ​ភិ​បាល​ចម្រុះ​របស់​នាយករ​ដ្ឋ​មន្ត្រី​លោក Shehbaz Sharif មុនពេល​បោះឆ្នោត​។​

​សេដ្ឋកិច្ច​អាច​ធ្លាក់ចុះ​កាន់តែ​ជិត​ដល់​កម្រិត​មហន្តរាយ​បំផុត ដោយសារ​ការប៉ះទង្គិច​ចុងក្រោយ ដែល​នាំ​ឲ្យ​មាន​អស្ថិរភាព​នយោបាយ ដោយ​អតីត​នាយករដ្ឋមន្ត្រី​លោក Imran Khan ដែលជា​មេដឹកនាំ​ប្រឆាំង​ដ៏​សំខាន់ បាន​ជាប់ផុង​ក្នុងការ​តស៊ូ​ដ៏​គ្រោះថ្នាក់​ជាមួយ​យោធា​ដ៏​មាន​ឥទ្ធិពល​របស់​ប្រទេស​។​

​ដើម្បី​ប្រឆាំង​បិទបាំង ចំពោះ​ឈុត​ឆាកនយោបាយ​ដ៏​សោកសៅ​នេះ រដ្ឋមន្ត្រីក្រសួង​ហិរញ្ញវត្ថុ លោក Ishaq Dar គ្រោង​នឹង​ថ្លែង​សុន្ទរកថា​ពី​ថវិកា​នៃ​ក្រសួង​របស់លោក​ទៅកាន់​សភា ក្រោយ​ម៉ោង ៤:00​រសៀល (​ត្រូវ​នឹង​ម៉ោង ១១:00 ម៉ោង​សកល​) នៅ​ថ្ងៃ​សុក្រ​នេះ​។​

​តួលេខ​នៃ​ថវិកា​មួយចំនួន​ត្រូវបាន​ប្រកាស កាលពីដើម​សប្តាហ៍​នេះ រួមទាំង​ការចំណាយ​លើ​ការអភិវឌ្ឍ​ចំនួន ១.១៥០​ពាន់​លាន​រូពី​ប៉ា​គី​ស្ថាន (៤​ពាន់​លាន​ដុល្លារ​) និង​គោលដៅ​កំណើនសេដ្ឋកិច្ច ៣,៥​ភាគរយ សម្រាប់​ឆ្នាំសារពើពន្ធ​ខាងមុខនេះ​។​

​កាលពី​ថ្ងៃ​ព្រហស្បតិ៍ មូលនិធិ​រូបិយវត្ថុ​អន្តរជាតិ ឬ IMF បាន​ឲ្យ​ដឹងថា ខ្លួន​កំពុង​ពិភាក្សា​អំពី​ថវិកា​ជាមួយ​ប៉ា​គី​ស្ថាន​។ ហើយ​រដ្ឋាភិបាល​របស់​លោក Sharif សង្ឃឹមថា នឹង​អាច​បញ្ចុះបញ្ចូល IMF ឲ្យ​ព្រម​បញ្ចេញ​យ៉ាងហោចណាស់ ២,៥​ពាន់​លាន​ដុល្លារ ដែល​នៅ​សេសសល់ ក្នុង​កម្មវិធី​ជំនួយ ៦,៥​ពាន់​លាន​ដុល្លារ ដែល​ប៉ា​គី​ស្ថាន​បាន​ចូលក្នុង​ឆ្នាំ​២០១៩ ហើយ​ដែល​នឹង​ផុតកំណត់​នៅ​ចុងខែ​នេះ​៕​