កណ្តាល៖ សម្តេចតេជោ ហ៊ុន សែន នាយករដ្ឋមន្រ្តី បានថ្លែងឲ្យដឹងថា មានពលរដ្ឋខ្មែរម្នាក់ កំពុងមានបញ្ហានៅ​ប្រទេសបារាំង បន្ទាប់ពីគាត់បានចាញ់បោកអ្នកនយោបាយមួយរូបដែលកំពុងរត់ចោលស្រុក តែយ៉ាងណា​សម្តេច​មិនទាន់បានបញ្ជាក់ថា ពលរដ្ឋខ្មែរ ដែលបានចាញ់បោកគេនោះជាស្រ្តី ឬបុរសនោះទេ។

ថ្លែងក្នុងឱកាសបន្តអញ្ជើញចុះជួបសំណេះសំណាលជាមួយកម្មករ-កម្មការិនី នៅស្រុកកណ្តាលស្ទឹង ខេត្តកណ្តាល នាព្រឹកថ្ងៃទី១០ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បានឲ្យដឹងថា កាលពីយប់ម៉ិញនេះ សម្តេចបានប្រាប់​ឲ្យឯកអគ្គរាជទូតខ្មែរប្រចាំប្រទេសបារាំង ជួយអន្តរាគមន៍ដល់ពលរដ្ឋខ្មែរម្នាក់នៅបារាំង បន្ទាប់ពីជនរងគ្រោះនោះ បានចាញ់បោក​អ្នកនយោបាយមួយរូបរហូតដល់មានបញ្ហាជាមួយអាជ្ញាធរបារាំង។

ជាមួយគ្នានោះដែរ សម្តេចតេជោ ហ៊ុន សែន បានបញ្ជាក់ថា សម្តេចនឹងឲ្យមាន​ការរៀបចំខ្សែវីដេអូមួយ​ផ្សព្វផ្សាយ​ជាសាធារណៈ ដើម្បីបកអាក្រាតពីទង្វើទុច្ចរិតរបស់មេដឹកនាំនយោបាយកំពុងរត់ចោលស្រុកម្នាក់នោះផងដែរ ដើម្បីឲ្យ​សារធារណៈជនដឹងអំពីអំពើទុច្ចរិត ថោកទាបរបស់អ្នកនយោបាយរូបនោះ៕ ដោយ៖ បាន ចក់