អាមេរិក ៖ អភិបាលរដ្ឋហ្វ្លរីដា (Florida) លោករ៉ន ឌឺសាន់តីស (Ron DeSantis) ដែលកំពុងឈរលេខ២ ឆ្ងាយពីក្រោយ​លោកដូ ណាល់ត្រាំ (Donald Trump) ក្នុងការស្ទង់មតិនៃការជ្រើសរើសបេក្ខជនរបស់គណបក្សសាធារណរដ្ឋ សម្រាប់តំណែងប្រធានាធិបតី បានរិះគន់ការចោទប្រកាន់លើអតីតប្រធានាធិបតី កាលពីថ្ងៃសុក្រ (ទី៩ មិថុនា) ដោយលើកឡើងពីអ្វីដែលលោកហៅថាជាស្តង់ដារពីរក្នុងការចេញបទចោទប្រកាន់។

ក្រុមរដ្ឋអាជ្ញាសហរដ្ឋអាមេរិក បានលាតត្រដាងបទចោទប្រកាន់ចំនួន ៣៧ករណី ប្រឆាំងនឹងលោកត្រាំ (Trump) កាលពីថ្ងៃសុក្រ ដោយចោទប្រកាន់រូបលោកពីបទបង្កហានិភ័យ​ដល់កិច្ចការសម្ងាត់​សន្តិសុខដ៏រសើប​បំផុតរបស់​ប្រទេសនេះ បន្ទាប់ពីចាកចេញពីតំណែង ក្នុងឆ្នាំ២០២១។

ដោយថ្កោលទោសចំពោះអ្វី ដែលលោកហៅថា ជាការយកទីភ្នាក់ងាររដ្ឋាភិបាលធ្វើជាអាវុធ លោកឌឺសាន់តីស (DeSantis) បាននិយាយនៅក្នុងសុន្ទរកថា កាលពីយប់ថ្ងៃសុក្រ ក្នុងរដ្ឋ North Carolina ថា៖ «ខ្ញុំគិតថា ត្រូវតែមានស្តង់ដារមួយ ក្នុងប្រព័ន្ធតុលាការ នៅក្នុងប្រទេសនេះ»។

យោងតាមឯកសាររបស់តុលាការសហព័ន្ធដែលបានផ្សព្វផ្សាយជាសាធារណៈ កាលពីថ្ងៃសុក្រ លោក Trump ប្រឈមមុខនឹងការចោទប្រកាន់បទឧក្រិដ្ឋកម្មចំនួន ៣៧ករណី ក្នុងនោះរួមទាំងការចោទប្រកាន់ពីបទ​រក្សាទុកឯកសារសម្ងាត់ដោយគ្មានការអនុញ្ញាត និងការសមគំនិត ក្នុងការរារាំងដំណើរការស្វែងរកយុត្តិធម៌ បន្ទាប់ពីរូបលោកបានចាកចេញពីសេតវិមាន ក្នុងឆ្នាំ២០២១។

ដោយមិនមានភ័ស្តុតាងសំអាង គណបក្សសាធារណរដ្ឋបានចោទប្រកាន់ថា ការស៊ើបអង្កេតលើលោកត្រាំ (Trump) ដែលកំពុងតែប្រជែងដើម្បីដណ្ដើមកៅអីសេតវិមានពីប្រធានាធិបតីអាមេរិកលោកចូ បៃដិន (Joe Biden) របស់គណបក្សប្រជាធិបតេយ្យ ក្នុងឆ្នាំ២០២៤ គឺជាការធ្វើឡើងក្នុងហេតុផលនយោបាយ តែលោកបៃដិន (Biden) និងក្រុមមន្ត្រីជាន់ខ្ពស់ បាននិយាយម្តងហើយម្តងទៀតថា ក្រសួងយុត្តិធម៌ កំពុងធ្វើកិច្ចការរបស់ខ្លួនដោយឯករាជ្យ៕