គុយបា ៖ ព្យុះដ៏ខ្លាំងនៅក្នុងប្រទេសគុយបា បានបណ្តាលឲ្យមានទឹកជំនន់ធ្ងន់ធ្ងរកាលពីថ្ងៃសុក្រទី ៩ ខែមិថុនា ដោយតំបន់ភាគកណ្តាល និងភាគខាងកើតនៃកោះនេះ រងផលប៉ះពាល់ខ្លាំងជាពិសេស។

ប្រព័ន្ធផ្សព្វផ្សាយក្នុងតំបន់បានរាយការណ៍ថា ការជន់លិចទន្លេជាច្រើន បានធ្វើឲ្យបាក់ស្ពាន នៅតំបន់ជនបទ ដែលបណ្តាលឲ្យភូមិនានាត្រូវបានកាត់ផ្តាច់។

តំបន់ដែលរងផលប៉ះពាល់ខ្លាំងបំផុត គឺទីក្រុង Jiguani ដែលនៅតែគ្មានអគ្គិសនីប្រើប្រាស់ ហើយក្រុមគ្រួសារជាច្រើន​ត្រូវបានជម្លៀសខ្លួនចេញ បន្ទាប់ពីទឹកទន្លេបានពេញហៀរ។ អាជ្ញាធរអាកាសធាតុ កំពុងព្យាករណ៍ថា​នឹងមាន​ភ្លៀងធ្លាក់ខ្លាំងរយៈពេលពីរថ្ងៃបន្ទាប់។

ការថតរូបភាពដោយឧទ្ធម្ភាគចក្រ បានចាក់ផ្សាយតាមទូរទស្សន៍រដ្ឋាភិបាលគុយបា បង្ហាញឲ្យឃើញទីក្រុង​នានានៅទូទាំងប្រទេសគុយបា បានជន់លិចទាំងស្រុងកាលពីថ្ងៃសុក្រ បន្ទាប់​ពីព្យុះដ៏ខ្លាំងបាន​វាយប្រហារតំបន់ភាគកណ្តាល និងភាគខាងកើតកោះនេះ។

អាជ្ញាធរបាននិយាយថា មនុស្សយ៉ាងហោចណាស់ម្នាក់បានស្លាប់ក្នុងពេលមានទឹកជំនន់។