អូទ្រីស៖ ផ្នែកមួយចំនួននៃប្រទេសអូទ្រីស កំពុងដោះស្រាយបញ្ហាធ្លាក់ព្រិលដ៏ខ្លាំងក្លា ការគំរាមកំហែងពីការបាក់ធ្លាក់ផ្ទាំងព្រិលខ្លាំងក្លា ទឹកជំនន់ដោយសារទឹកទន្លេឡើង និងបឹងបួរមានទឹកពេញហៀរគ្រប់កន្លែងកាលពីថ្ងៃចន្ទម្សិលមិញ។
បំណាក់ដីនៅក្នុងតំបន់បែតហ្កាសស្តេន នាភាគខាងត្បូងទីក្រុងសាលប៊ឺកបានបំផ្លាញលំនៅឋាន កាលពីពាក់កណ្ដាលអាធ្រាត្រដែលបានកប់ស្ត្រី ២នាក់ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន APA របស់ប្រទេសអូទ្រីស។ ក្រុមពន្លត់អគ្គិភ័យបានសង្គ្រោះស្ត្រីម្នាក់ក្នុងចំណោមពួកគេភ្លាមៗ និងសង្គ្រោះបានតែមនុស្សម្នាក់ទៀតប៉ុណ្ណោះ ក្រោយរយៈពេលជាច្រើនម៉ោងមក។ មនុស្សទាំង ២នាក់បានរងរបួស និងនាំយកទៅកាន់មន្ទីរពេទ្យ។ នៅពេលល្ងាចថ្ងៃនោះបំណាក់ដីមួយទៀត បានបាក់ទៅលើលំនៅឋានមួយខ្នងនៅតំបន់បេតក្លេនគីឆេន។ ក្រុមអាជ្ញាធរ និងក្រុមសុនខសង្គ្រោះកំពុងស្វែងរកអ្នកស្រុកបាត់ខ្លួនអាយុ ៨០ឆ្នាំម្នាក់ នេះជាសេចក្ដីរាយការណ៍ផ្សាយជាសាធារណរបស់ស្ថានីយ ORF។
នៅក្នុងហ្គឺកតាល់នៃតំបន់ការីនធីយ៉ា ក្រុមពន្លត់អគ្គិភ័យប្រហែល ៧០នាក់ត្រូវបានជម្លៀសអ្នកស្រុកចេញពីអគារ ១៥ខ្នងដោយសារតែទន្លេហ្គឺកមានទឹកពេញហៀរ។ ផ្លូវរថភ្លើងជាច្រើនខ្សែត្រូវបានរំខានដោយទឹកជំនន់ ហើយលំនៅឋានប្រហែល ១៧០០ខ្នងគ្មានអគ្គិសនីប្រើប្រាស់អស់រយៈពេលជាច្រើនម៉ោង។ តាមកន្លែងផ្សេងទៀតនៅភាគខាងត្បូងប្រទេសអូទ្រីស ភូមិជាច្រើនត្រូវបានរងគ្រោះដោយសារព្រិលធ្លាក់ខ្លាំង។ សាលារៀនមួយចំនួនត្រូវបានបន្តបិទ ហើយឧទ្ធម្ភាគចក្រមួយចំនួនហោះឆ្វែលតាមតំបន់ភ្នំ នៅក្បែររកមើលផ្ទាំងព្រិលក្រាស់ៗ៕
អត្ថបទ៖ រិទ្ធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
