បែលក្រាដ ៖ ប្រជាជនស៊ែរប៊ីរាប់ម៉ឺននាក់ បានចូលរួមក្នុងការតវ៉ាប្រឆាំងរដ្ឋាភិបាលនៅទីក្រុងបែលក្រាដ កាលពីថ្ងៃសុក្រទី ៩ ខែមិថុនា ជាលើកទី ៦ ចាប់តាំងពីថ្ងៃទី ៣ ខែឧសភា ដោយស្តីបន្ទោស​លើវប្បធម៌នៃអំពើ​ហិង្សាដែលបានបណ្តាលឲ្យមនុស្ស១៨នា​​ក់​ស្លាប់នៅក្នុងការបាញ់ប្រហារទ្រង់ទ្រាយធំចំនួនពីរលើក ហើយបានអំពាវនាវឱ្យរដ្ឋមន្ត្រីក្រសួងមហាផ្ទៃលាលែងពីតំណែង។ មានការស្រែកទាមទារឲ្យចាកចេញតំណែងប្រធានាធិបតីស៊ែរប៊ី លោក Aleksandar Vucic និងបានកាន់បដាដែល​សរសេរថា «សិស្សប្រឆាំងអំពើហិង្សា» ដែលក្រុមអ្នកតវ៉ាបានប្រមូលផ្តុំគ្នានៅខាងមុខសភា និងដើរដង្ហែទៅ​កាន់អគាររដ្ឋាភិបាល។

ប្រទេសស៊ែរប៊ីត្រូវបានរង្គោះរង្គើកាលពីខែមុន ដោយការបាញ់ប្រហារមិនធ្លាប់មានពីមុនមកចំនួនពីរ​លើកដែលបាន​កើតឡើងនៅថ្ងៃជាប់ៗគ្នា។ កាលពីថ្ងៃទី៣ ខែឧសភា ក្មេងជំទង់ម្នាក់ បានសម្លាប់មនុស្ស១០នាក់នៅ​សាលាបឋមសិក្សា​មួយកន្លែង ហើយកាលពីថ្ងៃទី ៤ ខែឧសភា បុរសអាយុ ២១ ឆ្នាំ ម្នាក់បានសម្លាប់មនុស្ស ៨ នាក់នៅក្នុងក្រុងមួយ ក្បែរទីក្រុង Belgrade ។ ក្រុមអ្នកតវ៉ាកំពុងទាមទារឱ្យមានការលាលែងពីតំណែងរបស់រដ្ឋមន្ត្រីមហាផ្ទៃប្រទេសស៊ែរប៊ីលោក Bratislav Gasic និងប្រធានអង្គភាពសេវាសម្ងាត់លោក Aleksandar Vulin ដែលពួកគេបានដាក់កំហុស​ចំពោះការពុំបាននាំយក​ក្រុមឧក្រិដ្ឋជនមកកាត់ទោស។ ពួកគេក៏ចង់បានការដកអាជ្ញាប័ណ្ណផ្សាយជាតិសម្រាប់ប៉ុស្តិ៍ទូរទស្សន៍ Pink TV និង Happy TV និងបម្រាមលើសារព័ត៌មានមួយចំនួនដែលពួកគេដាក់កំហុសចំពោះការផ្សព្វផ្សាយអំពើហិង្សា។ អ្នកតវ៉ាម្នាក់នាង មីលីកា បាននិយាយថា នេះជាហ្វូងមនុស្សដ៏ច្រើន ហើយប្រសិនបើអ្វីៗបន្តបែបនេះ ពួកគេនឹងត្រូវចុះចាញ់នឹងសម្ពាធនេះ។ នាយករដ្ឋមន្ត្រីលោកស្រី Ana Brnabic បាននិយាយកាលពីថ្ងៃពុធថា លោកស្រីសុខចិត្តលាលែងពីតំណែង ហើយបានអញ្ជើញគណបក្សប្រឆាំង ដែលបានគាំទ្រការតវ៉ាមកពិភាក្សា។ ប៉ុន្តែមេដឹកនាំក្រុមបាតុករបាននិយាយថា ពួកគេនឹងមិនសន្ទនាជាមួយរដ្ឋាភិបាលនោះទេរហូតទាល់​តែការទាមទារទាំង​អស់ត្រូវបានបំពេញ។ លោក Vucic បាននិយាយថា រដ្ឋាភិបាលរបស់លោកពុំមានកំហុសនោះទេ។