ភ្នំពេញ ៖សម្ដេចតេជោ ហ៊ុន សែន នាយករដ្ឋមន្ត្រី​នៃព្រះរាជាណាចក្រ​កម្ពុជាបាន​បន្តលើកឡើង​ជាថ្មីម្តង​ទៀត​ទាក់ទិន​​នឹងករណីដែលមានការរឹបអូសយកផ្ទះមកវិញពីសំណាក់​ម្ចាស់​​បុរីមួយ​ចំនួនដោយសារតែអ្នកទិញមិនបាន បង់ប្រាក់​តាមកិច្ចព្រមព្រៀង ដែលរឿងនេះកាលពីថ្ងៃម្សិលមិញសម្តេចបានណែនាំឱ្យម្ចាស់បុរីទាំងឡាយ​សម្របសម្រួល​រក​ដំណោះស្រាយ តាមរយះការឱ្យរៀបចំឥណទានថ្មីឡើង​វិញដើម្បីពន្យា​រយៈពេលនៃការ​បង់ឱ្យ​បានច្រើនឆ្នាំ ដើម្បី​ឱ្យ​ប្រាក់ដែលត្រូវបង់បានធ្លាក់មកនៅទាបជាងមុននិងដើម្បីឈ្នះ-ឈ្នះទាំងអស់គ្នា ។ប៉ុន្តែសម្រាប់ថ្ងៃនេះសម្តេចក៏បានលើកទឹកចិត្តឱ្យរឹបអូសយកតែម្តងទៅចំពោះជនណាដែលមិន​ព្រម​បង់​ដោយធ្វើតាម​ការញុះញង់របស់ជនក្បត់ជាតិ។

ការលើកឡើងរបស់សម្តេចបែបនេះ ត្រូវបានលើកឡើងនៅព្រឹកថ្ងៃទី១០ ខែមិថុនាក្នុងឱកាស​ដែលសម្តេចបាន​បន្ត​អញ្ជើញចុះជួបសំណេះ សំណាល ជាមួយកម្មករ-និយោជិតសរុបជាង១ម៉ឺន៦ពាន់នាក់ មកពីរោងចក្រសហគ្រាស​ចំនួន១២ នៅស្រុកកណ្តាលស្ទឹង ខេត្តកណ្តាល។

សម្តេចបានមានប្រសាសន៍ថា៖ម្សិលមិញនេះ បន្ទាប់ពីសម្តេចបានចេញសារទៅកាន់ម្ចាស់បុរីហើយ ក៏បានឃើញផ្ទះ​មួយចំនួនដែលបានបិទថានឹងមានការរឹបអូសនោះត្រូវបានដកចេញវិញ ប៉ុន្តែសម្តេចក៏បានព្រមាន​ទុកជាមុន​ផងដែរថា កុំយកហេតុផលដែលសម្តេចបានសំណូមពរនេះទៅជាមិនព្រមបង់ប្រាក់រំលោះដោយធ្វើតាមការ​ញុះញង់​របស់ពួក​បក្សប្រឆាំង។

សម្ដេចតេជោបានមានប្រសាសន៍ថា សម្ដេចប្រកាសជានយោបាយតែម្ដងព្រោះកាល ពីមុនពេលបោះឆ្នោត គេបាន​ប្រកាសថាឲ្យតែគេឈ្នះ ឆ្នោតគេឲ្យលុបបំណុលចោលទាំងអស់។ អ៊ីចឹងទេ សម្ដេចក៏បញ្ជាក់ត្រឡប់ទៅវិញថា ល្ងាចនេះ បើថាអ្នកណាហើយដែលទិញផ្ទះតាមបុរីបើដឹងថាអ្នកហ្នឹង​ជាក្រុមប្រឆាំងមិនចង់​សងតាមការញុះញង់​របស់មេបក្ស​ប្រឆាំង សម្ដេចបានលើកចិត្តឲ្យរឹបអូសយកមុនគេតែម្ដងទៅ។ សម្ដេចថាត្រូវតែកាត់ឲ្យដាច់នូវឫសគល់។ ប៉ុន្តែទោះជាយ៉ាងណាក៏ដោយសម្ដេចបានផ្ដាំផ្ញើ ឱ្យពិនិត្យមើលឱ្យបានច្បាស់លាស់ព្រោះអ្នកខ្លះ គាត់អត់មានលុយ​បង់មែន។

គួរបញ្ជាក់ថា ៖ នៅល្ងាចនេះ សម្តេចតេជោនឹងមានជំនួប ប្រកាសទទួលស្គាល់ និងអាហារសាមគ្គីជាមួយសមាគមអ្នក​ឧកញ៉ាកម្ពុជា ហើយក្នុងជំនួបសង្ឃឹមថា និងមានដំណោះស្រាយបានល្អ ជុំវិញរឿងរ៉ាវខាងលើនេះ៕