អ៊ុយក្រែន ៖ កងទ័ពអ៊ុយក្រែន ទំនងជាកំពុងចាប់ផ្តើមការវាយលុកដែលរំពឹងទុកជាយូរមកហើយរបស់ខ្លួន ខណៈ​ទីក្រុងគីវ មានបំណងវាយបំបែកការការពាររបស់ទីក្រុងមូស្គូ និងដណ្តើយកមកវិញទឹកដីរបស់ខ្លួន។ ទីក្រុងគីវ នៅតែពុំច្បាស់លាស់អំពីផែនការរបស់ខ្លួន និងបាននិយាយថា នឹងពុំមានការប្រកាសជាផ្លូវការនោះទេ ដោយព្យាយាម​ប្រើប្រាស់ភាពមិនច្បាស់លាស់នៃសង្គ្រាមដើម្បីផលចំណេញរបស់ខ្លួន។ 

ក្រសួងការពារជាតិដែលផ្សព្វផ្សាយឲ្យដឹងតាមបណ្តាញផ្សព្វផ្សាយសង្គមរបស់អ៊ុយក្រែន បានចែករំលែកវីដេអូមួយ កាលពីថ្ងៃទី៤ ខែមិថុនា ដោយបង្ហាញក្រុមទាហានក្នុងសម្លៀកបំពាក់ឯកសណ្ឋានកំពុងបញ្ជូនសញ្ញាពីភាពម៉ឺងម៉ាត់។ វីដេអូបាននិយាយថា ផែនការផ្តោតសំខាន់លើភាពស្ងប់ស្ងាត់ ដែលត្រូវបានជឿជាក់យ៉ាងទូលំទូលាយ​ថាកំពុងត្រៀម​ធ្វើការវាយបក។ ប៉ុន្តែកាលពីថ្ងៃព្រហស្បតិ៍ ទី៨ ខែមិថុនា  វិទ្យាស្ថានសម្រាប់ការសិក្សាសង្គ្រាម(ISW) បាននិយាយនៅលើបណ្តាញ Twitter ថា ការវាយបករបស់អ៊ុយក្រែន បានចាប់ផ្តើមហើយ។ វិទ្យាសា្ថន ISW និយាយថា ប្រតិបត្តិការវាយបកដំបូងរបស់អ៊ុយក្រែន អាចជួបការលំបាកបំផុត និងយឺតបំផុត ខណៈពួកគេ​ជាប់ពាក់ព័ន្ធទៅនឹង​ទីតាំង​ការពារនានាដែលបានត្រៀមទុកយ៉ាងច្បាស់លាស់។ ដំណាក់កាលនេះ អាចមើល​ឃើញផងដែរ ពីការបាត់បង់​ខាងភាគីអ៊ុយក្រែនច្រើនបំផុត។ អ្នកវិភាគយោធា លោក Michael Kofman បានប្រាប់សារព័ត៌មាន The Financial Times កាលពីថ្ងៃព្រហស្បតិ៍ថា ដោយផ្អែកលើសកម្មភាពកាលពីម្សិលមិញ និងប្រព័ន្ធរបស់ប្រទេសលោកខាងលិច​ដែលបាន​ដាក់ឲ្យដំណើរការ វាទំនងជាថា ការវាយលុករបស់អ៊ុយក្រែ​នកំពុងចាប់ផ្តើម។

រយៈពេលជាច្រើនសប្តាហ៍មកនេះ ទីក្រុងគីវ បានចាត់វិធានការក្នុងការត្រៀមសម្រាប់ការវាយលុក ដូចជា យានដ្រូន​បាញ់​ទៅលើទីក្រុងមូស្គូ ការវាយប្រហារលើទឹកដីរុស្ស៊ី និងការឈ្លបយកការណ៍​ដើម្បីសាកល្បង​ការការពាររបស់​រុស្ស៊ី។ ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃសុក្រថា ការវាយបករបស់អ៊ុយក្រែន បានចាប់ផ្តើម​ហើយ ប៉ុន្តែរហូតមកដល់ពេលនេះ ទីក្រុងគីវ ពុំបានឈានដល់គោលដៅរបស់ខ្លួននោះទេ។