រុស្ស៊ី ៖ ប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) បានថ្លែង កាលពីថ្ងៃសុក្រ (ទី៩ ខែមិថុនា) ថា ប្រទេសរុស្ស៊ីនឹងចាប់ផ្តើមដាក់ពង្រាយអាវុធនុយក្លេអ៊ែរតាកទិក នៅក្នុងប្រទេសបេឡារុស បន្ទាប់ពីឃ្លាំងផ្ទុក​ពិសេសត្រូវ​បានសាងសង់រួចរាល់ នៅថ្ងៃទី៧ ខែកក្កដា និងថ្ងៃទី៨ ខែកក្កដា ដោយនេះជាសកម្មភាព​នៃការដាក់ក្បាល​គ្រាប់របស់អាវុធបែបនេះជាលើកដំបូងរបស់ទីក្រុងម៉ូស្គូ នៅក្រៅប្រទេសរុស្ស៊ី គិតចាប់តាំងពីការដួលរ​លំសហភាពសូវៀត។

លោកពូទីនបានប្រកាសកាលពីខែមីនាថា លោកបានយល់ព្រមដាក់ពង្រាយអាវុធបែបនេះ នៅក្នុងប្រទេសបេឡារុស ដោយសំអាងដល់ការដាក់ពង្រាយអាវុធនុយក្លេអ៊ែរតាកទិករបស់សហរដ្ឋអាមេរិក នៅក្នុងប្រទេសអឺរ៉ុបមួយចំនួន​ជាច្រើនទសវត្សរ៍មកហើយ។

ក្នុងកិច្ចពិភាក្សាអំពីគម្រោងដាក់ពង្រាយនុយក្លេអ៊ែរ អំឡុងពេលទទួលទានអាហារ នៅឯកន្លែងសម្រាករដូវក្តៅរបស់​មេដឹក​នាំរុស្ស៊ី នៅរមណីយដ្ឋានសមុទ្រខ្មៅក្នុងក្រុង Sochi លោក ពូទីន បានប្រាប់ប្រធានាធិបតីបេឡារុស លោក Alexander Lukashenko ថា៖ «អ្វីៗគ្រប់យ៉ាងដំណើរការទៅតាមផែនការ»។

យោងតាមប្រតិចារិករបស់វិមានក្រឹមឡាំងនៃសុន្ទរកថារបស់លោក លោកពូទីនបាននិយាយថា៖ «ការរៀបចំទីតាំងពាក់​ព័ន្ធនានា នឹងបញ្ចប់នៅថ្ងៃទី៧ ខែកក្កដា ដល់ថ្ងៃទី៨ ខែកក្កដា ហើយយើងនឹងចាប់ផ្តើមភ្លាមៗនូវសកម្មភាព​ទាក់ទងនឹង​ការដាក់ពង្រាយអាវុធប្រភេទសមស្របនៅលើទឹកដីរបស់អ្នក»។ ហើយលោក Lukashenko បានតបវិញថា៖ «សូមអរគុណលោក វ្ល៉ាឌីមៀរ វ្ល៉ាឌីមៀរ៉ូវិច (Vladimir Vladimirovich)»។

រយៈពេលជាង ១៥ខែ ក្នុងសង្រ្គាមថ្មើរជើងដ៏ធំបំផុត នៅអឺរ៉ុប គិតចាប់តាំងពីសង្គ្រាមលោកលើកទី២ មក លោកពូទីន​និយាយថា សហរដ្ឋអាមេរិក និងសម្ព័ន្ធមិត្តលោកខាងលិច កំពុងបញ្ចូលអាវុធចូលទៅក្នុងប្រទេសអ៊ុយក្រែន ដែលជា​ផ្នែក​មួយនៃការពង្រីកសង្គ្រាមតំណាង ដែលមានបំណងធ្វើឲ្យប្រទេសរុស្ស៊ីកាន់តែចុះខ្សោយ។

សកម្មភាពនុយក្លេអ៊ែររបស់លោក ពូទីន កំពុងត្រូវបានឃ្លាំមើលយ៉ាងដិតដល់ដោយសហរដ្ឋអាមេរិក និងសម្ព័ន្ធភាព​យោធាណាតូ (NATO) នៅអឺរ៉ុប និងដោយប្រទេសចិន ដែលបានព្រមានម្តងហើយម្តងទៀត​ប្រឆាំងនឹងការប្រើ​ប្រាស់អាវុធ​នុយក្លេអ៊ែរ នៅក្នុងជម្លោះ៕